“Çarmatoset” Uljan Shpataraku, i konfiskohet arsenali me armë në banesë

Ish-zyrtari i Policisë së Shtetit, Uljan Shpataraku, është privuar nga leja e armës, ndërsa autoritetet i kanë marrë edhe armët që mbante në banesë me leje.

Vendimi vjen disa javë pasi Shpataraku u përjashtua nga radhët e Policisë së Shtetit, dhe pas arrestimit të tij në kuadër të hetimeve për përkrahje të autorit të krimit. Ai u kap duke drejtuar automjetin e Ergys Agasit.

Pas përjashtimit nga Policia, ndaj ish-zyrtarit nisën edhe procedurat për heqjen e lejes së armës që kishte për shkak të funksionit.

Gjatë verifikimeve, autoritetet konstatuan se Shpataraku dispononte me leje edhe një numër të konsiderueshëm armësh private, të cilat i mbante në banesën e tij.

Shpataraku ishte një prej emrave të rëndësishëm në strukturat e Policisë dhe është përshkruar si një prej bashkëpunëtorëve të afërt të ish-kryepolicit Ilir Proda.