Ceremonia për presidenten e re të KE, Xhaçka në Berlin

Me ftesë të veçantë të ministres së re të Mbrojtjes së Gjermanisë Annegret Kramp-Karrenbauer, ministrja e Mbrojtjes Olta Xhaçka, do të marrë pjesë sot në mbrëmje, në ceremoninë e përcjelljes së ministres së sapodorëhequr të Mbrojtjes të Gjermanisë Ursula von der Leyen, e cila u zgjodh presidente e Komisionit Europian.

Në ceremoninë ushtarake me traditë 200-vjeçare, që u rezervohet personaliteteve më të spikatura të politikës do të marrin pjesë bashkëpunëtorët dhe miqtë më të afërt të ish-ministres Ursula von der Leyen. Vetëm pak javë përpara se të zgjidhej në detyrën më të lartë të Bashkimit Europian, Ursula von der Leyen, në cilësinë e ministres së Mbrojtjes, priti në një vizitë zyrtare në Berlin ministren Xhaçka.

Në ceremoninë ku marrin pjesë personalitete nga e gjithë bota, do të jetë e pranishme edhe kancelarja Merkel, e cila do të mbajë fjalën e rastit. Ursula von der Leyen është e para grua që zgjidhet presidente e Komisionit Europian dhe pritet ta marrë detyrën më datë 1 nëntor 2019.