Një telefon celular i markës iPhone është gjetur gjatë një kontrolli të papritur të zhvilluar këtë të premte, më 13 nëntor 2026, në burgun e Shkodrës.
Operacioni i kontrollit është kryer nga Agjencia e Mbikëqyrjes në Sistemin e Ekzekutimit të Vendimeve Penale (AMSEVP), në bashkëpunim me strukturat e sigurisë së institucionit penitenciar.
Sipas njoftimit zyrtar, aparati celular është konstatuar në ambientet e përbashkëta të burgut, gjatë kontrolleve që kishin si qëllim identifikimin e sendeve të ndaluara.
Pas zbulimit të telefonit, kanë nisur veprimet procedurale për dokumentimin e plotë të rastit. Dosja pritet t’i përcillet Prokurorisë së Shkodrës për hetime të mëtejshme lidhur me veprën penale të futjes ose mbajtjes së sendeve të ndaluara në institucionet e ekzekutimit të vendimeve penale, sipas nenit 324/a të Kodit Penal.
Ende nuk është bërë e ditur se kujt i përkiste telefoni apo si ka përfunduar ai brenda ambienteve të burgut.
