Çfarë tha shefi i Interpolit në momentin e arrestimit

Artan Bajraktari ka treguar se përse e kishte mbajtur të fshehtë kërkesën e Interpolit belg për arrsetimin e deputetit të mazhorancës, Mark Frroku. Pas arrestimit nga SHKB, ai mësohet se ka dhënë detaje mbi arsyet e këtij veprimi. Po t’i referohemi ish kryeministrit Berisha, që citon burime të besueshme, Bajraktari u ka thënë hetuesve se ai e kishte informuar Artan Didin dhe vetë Ministrin e Brendshëm Saimir Tahiri se në zyrën e tij kishte mbërritur kërkesa nga Belgjika për arrestimin. Por ai e ka mbajtur atë të fshehtë. Nuk është e qartë nëse Bajraktari i ka informuar Didin e Tahirin përmes shkresave zyrtare apo vetëm verbalisht. Sipas Berishës ata i kanë thënë ta bllokojë kërkesën, ndonëse ajo i është dërguar dy herë brenda muajit janar. Fakti që shkresa nuk u është përcjellë organeve, duke konsumuar veprën penale të shpërdorimit të detyrës, e çoi në pranga Bajraktarin. Por fakti tjetër që Didi u dorëhoq menjëherë pas arrestimit duket se ka të bëjë me deklaratat e Bajraktarit pas arrestimit. Veç ish kryeministrit Berisha, edhe disa burime të tjera të policisë bëjnë me dije se Bajraktari ka pohuar që e ka vënë në dijeni Drejtorin e Përgjithshëm të Policisë së Shtetit për kërkesën e belgëve dhe se ka qenë ai që i ka kërkuar të mos e publikonte atë. Përmendja e emrit të Didit nga shefi i arrestuar tashmë i zyrës së Interpolit e implikon atë në këtë ngjarje. Por deri tani nuk ka të dhëna zyrtare të përfshirjes së Didit në hetime.