Cili është mesazhi që përcjell Gjergj Luca nga kompleksi “Apollonia Rozafa” në Fier?

Nga Albert Vataj

Në një tjetër komunikim të drejtpërdrejtë me ndjekësit e tij në rrjetet sociale, sipërmarrësi Gjergj Luca ka zgjedhur të mos flasë për investime, shifra apo projekte, por për një vlerë shumë më të thjeshtë dhe njëherazi shumë më të thellë: dashurinë për jetën. Përmes një videoje të realizuar në ambientet e kompleksit “Apollonia Rozafa” në Fier, ai përcjell një mesazh simbolik, ndërsa merr pjesë vetë në mbjelljen e luleve që do të zbukurojnë këtë superinvestim, i cili tashmë numëron ditët deri në inaugurim.

“A keni mbjellë ndonjëherë lule?”, pyet Luca në fillim të videos. Më pas ai vijon me një reflektim të thjeshtë, por kuptimplotë: “Lulja është jetë, pema është jetë. Mbillni lule, mbillni pemë, falini dashuri shpirtit tuaj. Mbusheni shpirtin me dashuri, sepse pa dashuri nuk ka asgjë në këtë jetë.”

Është një mesazh që shkon përtej gjestit simbolik të mbjelljes së një luleje. Ai fton njerëzit të kultivojnë mirësi, të ndërtojnë marrëdhënie me natyrën dhe me njëri-tjetrin, duke e parë dashurinë si themelin mbi të cilin ngrihet çdo vepër e qëndrueshme.

Videon, sipërmarrësi e shoqëron edhe me një thirrje që tingëllon si një apel qytetar: “Mblidhni mendjen, mbillni lule, mbillni pemë, mbillni jetë, mbillni dashuri. Mos mbillni urrejtje se e morët veten më qafë!” Një mesazh i drejtpërdrejtë që nxit reflektimin në një kohë kur polarizimi dhe gjuha e urrejtjes zënë shpesh vendin e dialogut dhe mirëkuptimit.

Ndërkohë, kompleksi “Apollonia Rozafa”, i vendosur në një nyjë strategjike mes Fierit dhe Vlorës, është në fazën përfundimtare të përgatitjeve për hapjen zyrtare. Projekti pritet të hyjë në hartën shqiptare të investimet më të rëndësishme që kompanisë Rozafa po përmbush tashm, duke përfaqësuar një tjetër hap të madh në vizionin sipërmarrës të Gjergj Lucës për zhvillimin ekonomik, krijimin e vendeve të punës dhe promovimin e prodhimit shqiptar.

Ky investim nuk synon të jetë thjesht një qendër tregtare apo një hapësirë argëtimi. Ai është konceptuar si një ekosistem ekonomik dhe social, ku ndërthuren prodhimi, tregtimi, gastronomia, turizmi dhe përvoja e vizitorit. Në zemër të këtij projekti qëndron fermeri shqiptar, prodhuesi vendas dhe puna e tokës, të cilëve u krijohet një platformë moderne për të prezantuar dhe tregtuar produktet e tyre.

Në këtë hapësirë, prodhimet bujqësore dhe blegtorale shqiptare nuk do të jenë më thjesht mallra që qarkullojnë në mënyrë informale, por produkte me identitet, cilësi dhe vlerë të shtuar, të prezantuara sipas standardeve bashkëkohore dhe të denja për konsumatorin vendas e të huaj.

Kjo filozofi e zhvillimit shkon përtej ekonomisë. Ajo mbart edhe një dimension kulturor e shoqëror, sepse rikthen në qendër të vëmendjes dinjitetin e punës, respektin për tokën dhe besimin se zhvillimi i një vendi nis nga mbështetja e njerëzve që prodhojnë.

Nuk është rastësi që, pikërisht në këtë vend, pak ditë para hapjes së dyerve të kompleksit, Gjergj Luca zgjedh të mbjellë lule. Është një gjest simbolik që përmbledh filozofinë e projektit: aty ku mbillet një lule, mbillet shpresë; aty ku mbillet një pemë, mbillet e ardhmja; dhe aty ku mbillet dashuria, lind një komunitet më i fortë, më i begatë dhe më njerëzor.