Çmimi i naftës rritet sërish, Erion Braçe: Tregtarët po e mbajnë tregun të bllokuar

Deputeti i PS-së, Erion Braçe, ka reaguar për rritjen e çmimit të naftës në tregun vendas, duke akuzuar tregtarët për mungesë transparence dhe për një treg që, sipas tij, nuk funksionon me konkurrencë të vërtetë. Në një reagim publik, Braçe deklaron se nafta standarde është shitur me 185 lekë për litër, ndërsa variantet e cilësuara prej tij si “e mira” kanë arritur çmime më të larta, duke paralajmëruar se çmimet mund të rriten më tej nëse nuk ndërhyhet.

Postimi i plotë

Tregtarët e naftës e çuan çmimin sot në 185 lekë për litër, 6 lekë më shumë! Dhe kjo është ajo nafta standarde, ajo tjetra “e mira” shitet me çmim 189, 190, 191 lekë për litër! Në tre ditë, tregtarët e rritën çmimin dy herë, 9 lekë për litër!

Në tre javë fill pasi bordi ndërpreu vendimmarrjen, tregtarët e naftës e mbajtën çmimin të pandryshuar! Edhe pse në bursë çmimi u ul në nivelet e para luftës, edhe pse kursi i monedhës ra në nivele historike. Po t’i lëmë të lirë, në fillim të javës tjetër “e mira” do të ketë çmim 200 lekë, edhe një herë.

Ajo që të acaron më shumë ka të bëjë me mungesën e transparencës; çmimi të përplaset në tabelë dhe nuk ka asnjë shpjegim; ti duhet ta paguash; te çdo pompë, çdo kompani, një çmim, në të njëjtën ditë, në të njëjtën orë! Tregu është i mbyllur, pa konkurrencë dhe pa çmime produkt i konkurrencës, 20 vite i njëjti treg, të njëjtat kompani.

Koha ka kaluar për një treg me konkurrencë; ngjarje të jashtëzakonshme, si luftërat, instrumentet e përdorura për çmimet gjatë luftërave, e nxjerrin edhe më qartë tregun e kapur e të bllokuar! Nëse do të pranojmë edhe më shumë këtë treg, do të duhet vetëm një ndërhyrje, përcaktimi i nivelit të fitimit, siç bën bordi.