Costa dhe Kallas vizitojnë Ukrainën në ditën e parë të detyrës

Presidenti i ri i Këshillit Evropian, Antonio Costa dhe shefja e politikës së jashtme, Kaja Kallas vizituan sot Kievin për të treguar mbështetjen e BE-së për Ukrainën dhe kjo në ditën e tyre të parë në detyrë.

Gjatë vizitës së tyre shumë simbolike, dyshja planifikon të takohet me presidentin ukrainas, Volodymyr Zelensky dhe ta sigurojë atë për mbështetjen e Bashkimit Evropian në luftën gjithëpërfshirëse të Rusisë kundër Ukrainës, e cila filloi në shkurt 2022.

“Ne erdhëm për të dhënë një mesazh të qartë se ne qëndrojmë me Ukrainën dhe ne vazhdojmë të japim mbështetjen e plotë për të”, tha Costa.

”Kjo përfshin edhe mbështetje humanitare, financiare, ushtarake dhe diplomatike”, shtoi ai.

Ai tha se një temë, përveç konfliktit aktual, do të ishte “e ardhmja e tyre e përbashkët evropiane” dhe integrimi i planifikuar i Ukrainës në BE.

Costa dhe Kallas të dy zyrtarisht morën detyrën orë më parë, në mesnatë, së bashku me ekipin e ri të komisionerëve nën mandatin e dytë të presidentes së Komisionit Evropian, Ursula von der Leyen.

Ata zëvendësojnë ish-presidentin e Këshillit Evropian Charles Michel dhe kryediplomatin e mëparshëm të bllokut Josep Borrell, pas zgjedhjeve të BE-së në qershor.

Vizita e dy zyrtarëve të BE-së vjen në një moment veçanërisht të vështirë për Ukrainën.

Në lindje të vendit, forcat ruse kanë arritur përfitime të konsiderueshme territoriale.

Në të njëjtën kohë, është e paqartë nëse Shtetet e Bashkuara do të vazhdojnë nivelin aktual të mbështetjes, pasi presidenti i sapozgjedhur i SHBA Donald Trump të marrë detyrën në janar.

Nëse nuk do të jetë kështu, vendet evropiane do të duhet të rrisin ndjeshëm ndihmën e tyre ushtarake për Ukrainën që të vazhdojë luftën e saj mbrojtëse.

Shefja e politikës së jashtme të BE-së Kaja Kallas tha se ishte thelbësore që Evropa t’i tregojë Ukrainës se qëndron në krah të saj.

”Situata në fushën e betejës është shumë, shumë e rëndë”, tha ajo./  a.jor. ATSH