Dalin rezultatet për stafin e spitalit të Lezhës

Bluzat e bardha janë në vijën e parë në këtë pandemi të Covid-19, pasi po shpëtojnë jetë. Por nga ana tjetër, kjo i bën edhe më të ekspozuar ndaj virusit vdekjeprurës. Stafi i spitalit rajonal i Lezhës, konkretisht pavioni i ortopedisë mund të marrin frymë lirisht pasi i gjithë personeli i spitalit rezultuan negativ nga virusi i ri, pas publikimit të rezultateve të testeve që ata kryen.

Është Shoqata e Infermierëve Lezhë, e cila përmes një postimi në facebook ka njoftuar pak minuta më parë se rezultati i testit për personelin e Spitalit Lezhë është negativ për COVID-19. Lajmin e mirë e ka bërë të ditur Ledion Prendi në faqen zyrtare të Shoqatës.

“Lajm i mirë për të gjithë personelin e spitalit Lezhë, që rezultoi negativ në testin e bërë për Covid-19. Zoti ju ruajt dhe mirënjohje pafund për punën tuaj humane dhe me vlera jetësore. Kam ndjerë këto dy ditë çdo shqetësim tuajin në mesazhet që më keni bërë, e s’mundem dot pa gëzuar për secilin prej jush si të isha dhe unë në mesin tuaj”.