Dashamir Shehi kritikon protestat e Berishës: Kjo rrugë nuk e çon askund

Protestat e opozitës po bëhen gjithnjë e më patetike dhe po zvogëlohen dita ditës. Për Dashamir Shehi, kjo tregon qartë se opozita ka nevojë për ndryshim real, si në mënyrën e protestës, ashtu edhe në rregullat e lojës politike. Ai shpjegoi se një protestë që të jetë e suksesshme duhet të burojë nga rebelimi popullor dhe ky i fundit nuk duhet pilotuar nga politika.

“Unë them që nuk i bën mirë opozitës. Ka një element patetizmi politik. Kjo nuk është rruga e duhur. Mua më shqetëson që kjo është një rrugë pa krye, dhe po vjen e po zvogëlohet dhe po humbet inercinë. E patë edhe vetë herën e fundit kishte më pak njerëz. Përse kishte pak njerëz?

Se janë po të njëjtët njerëz që vijnë çdo dy javë, një herë në muaj, që lodhen sepse protestën e nxit tharmi politik, por ka edhe nevojë për momente entuziazmi, rebelim popullor dhe jo të pilotuar nga politika. Çfarë ndodhi këtë radhë? Asgjë e madhe. Partia është e mbyllur. Berisha ka qenë kryetar, Berisha do të jetë kryetar prapë, ndaj harxhojnë kot energji”, tha Shehi.