Pandemia e Covid-19 ka ndryshuar botën edhe nga mendimet. ”Një votë më shumë për Lega (parti politike në Itali), një shqiptar më pak në Milano”,-ka qenë një nga sloganet e partisë në kohën kur Matteo Salvini nuk e fshehu racizmin, po i njëjti Salvini që së fundmi zbuloi një dashuri të befasishme për Shqipërinë. Videoja e kryeministrit Edi Rama që fliste për popullin italian dhe ndihmën e Shqipërisë ndaj Italisë përmes ekipit të mjekëve dhe infermierëve, mori goxha vëmendje ndërkombëtare.
Ish-ministri i Brendshëm italian gjithashtu shprehu mirënjohje për shqiptarët, aq sa u tha njerëzve se kishte telefonuar Ramën për ta falenderuar. Nisur nga postimet e hershme në Twitter, deri para pak kohësh nuk dukej sikur kishte ndonjë adhurim për Shqipërinë, madje ka “protestuar” kundër Bashkimit Europian dhe faktit që i dha Shqipërisë statusin e vendit kandidat për në BE.
Salvini ka mbajur një qëndrim dhe politikë strikte kundrejt emigrantëve duke u shprehur se nga portet e hapura (ku bëhet fjalë për klandestinët) vendit i vjen vetëm e keqja. Të njëjtin qëndrim, Salvini ka pasur edhe ndaj emigrantëve shqiptarë, që i ka quajtur “kriminelë”, ndonëse më pas ka sqaruar se “është abuzuar me përgjithësimin”, sepse u referohej vetëm personave të përfshirë në veprimtari kriminale.
