Dëbora mbulon Kukësin, prefekti Safet Gjici mbledh Shtabin e Emergjencave Civile

Nën drejtimin e prefektit të Qarkut Kukësit, Safet Gjici, është mbledhur Shtabi i Emergjencave Civile, për të diskutuar të gjitha problematikat e shfaqura gjatë 24 orëve të fundit, pas reshjeve të dëborës që kanë pushtuar verilindjen dhe veriun e vendit. Prefekti Gjici tha se Qarku i Kukësit u përfshi nga reshje dëbore dhe shiu, si edhe lëvizje të temperaturave, duke krijuar probleme serioze në jetën e komunitetit të këtij qarku. Ai ka shtuar, se në të gjitha rrugët mbizotëron një situatë e qëndrueshme, pasi automjetet mund të qarkullojnë pa zinxhirë. Rruga e Kombit, konkretisht segmenti Kalimash – Kukës – Morinë, është mbajtur gjatë gjithë kohës e qarkullueshme pa zinxhirë, ku janë aktivizuar çdo ditë 12 borëpastruese dhe 4 fadroma, ndërkohë që në ditët me ngarkesë janë aktivizuar 22 borëpastruese e 7 fadroma. Të bllokuara janë qendrat e komunave Arrën dhe Lekbibaj. Ndërkohë, qarkullojnë me zinxhirë qendrat e komunave Kalis dhe Grykë-Çajë. Për shkak të erërave të forta, i gjithë qarku i Kukësit ka pasur probleme sa i takon furnizimit me energji elektrike. Për pasojë, ka probleme në furnizimin me energji të popullatës, si në komunat e zonës së Grykës së Vanave, komunat Zapod, Shishtavec dhe Topojan, ashtu dhe në komunat që furnizohen nga Peshkopia: Kalis, Bushtricë dhe Grykë Çajë . Veç kësaj, edhe disa zona të tjera të rrethit të Has-it. Prefekti ka kërkuar që të ketë një angazhim serioz dhe të plotë nga të gjithë strukturat dhe Njësitë e Qeverisjes Vendore, për kryerjen e detyrave funksionale dhe ligjore, me qëllim përballimin edhe të kësaj situate dimërore.