Presidenti amerikan, Donald Trump tha të premten në një intervistë për “Time” se SHBA-ja ishte duke zhvilluar negociatat për tarifat me Kinën, por Pekini i hodhi poshtë këto pretendime – në një seri sinjalesh kontradiktore mbi progresin për uljen e tensioneve të luftës tregtare që kërcënon të dëmtojë ekonominë globale, sipas “Reuters”.
Trump tha se bisedimet SHBA-Iran ishin duke u zhvilluar dhe se presidenti kinez, Xi Jinping e kishte telefonuar, një pohim që ai e përsëriti për gazetarët në Shtëpinë e Bardhë të premten në mëngjes – ndërsa ai po nisej në Romë për të marrë pjesë në funeralin e Papa Françeskut.
“Kina dhe SHBA-ja NUK po zhvillojnë asnjë konsultim apo negociatë mbi tarifat”, kundërshtoi Kina në një deklaratë të Ministrisë së Jashtme të postuar nga Ambasada Kineze në SHBA.
“SHBA-ja duhet të ndalojë së krijuari konfuzion”, thuhet në deklaratë.
Duke folur me gazetarët në bordin e “Air Force One” Trump tha se do të ishte një fitore nëse Kina do të hapte tregjet e saj për produktet amerikane dhe se negociatat mbi tarifat mund ta mundësonin këtë.
Të shtunën, ministri i Jashtëm kinez, Wang Yi tha se Pekini i përmbahej rregullave ndërkombëtare mbi tarifat e vendosura nga SHBA-ja dhe do të kërkonte solidaritet me vendet e tjera.
“Disa vende i përmbahen prioriteteve të tyre, angazhohen në presione ngacmuese dhe transaksione shtrënguese, dhe provokojnë luftëra tregtare pa asnjë arsye, duke ekspozuar egoizmin e tyre ekstrem”, tha Wang në një takim rajonal në Kazakistan.
Këto debate rritin pasigurinë e konsiderueshme rreth politikës së çrregullt të tarifave të Trump, jo vetëm rreth Kinës, por edhe për sa i përket dhjetëra vendeve që po përpiqen të arrijnë marrëveshjet e tyre për të lehtësuar barrën e taksave të larta të importit – që presidenti amerikan ka shpallur që kur u kthye në Shtëpinë e Bardhë në janar.
Ekipi i tij i negociatorëve po zhvillon atë që përbën raundin e shpejtë të bisedimeve tregtare me zyrtarë të huaj që u mblodhën në Uashington këtë javë – për takimet pranverore të Fondit Monetar Ndërkombëtar dhe Grupit të Bankës Botërore.
Ndërsa është qartësuar nëse po arrihen marrëveshje për të shmangur vendosjen e tarifave edhe më të larta në fillim të korrikut, ka pasur shenja të shmangies së përshkallëzimit.
Kina përjashtoi disa importe amerikane nga tarifat e saj të larta, pasi grupet e biznesit thanë se Pekini ka lejuar disa produkte farmaceutike të prodhuara në SHBA të hyjnë në vend pa paguar tarifat prej 125% – që Pekini vendosi këtë muaj në përgjigje të tarifave prej 145% të Trump ndaj importeve kineze.
Administrata e Trump gjithashtu ka sinjalizuar ditët e fundit se po kërkon të qetësojë tensionet me Kinën, ndërsa Bessent tha se të dyja palët e shihnin gjendjen aktuale si të papërshtatshme.
Trump u tha gazetarëve në Shtëpinë e Bardhë se ishte shumë afër një marrëveshjeje me Japoninë.
Kjo shihet nga analistët si një “rast prove” për marrëveshje të tjera dypalëshe tregtare, megjithëse bisedimet mund të jenë të vështira.
Disa presin që kryeministri Shigeru Ishiba dhe Trump të shpallin një pakt kur të takohen në qershor, në samitin e Grupit të Shtatë kombeve, në Kanada.
Trump tha gjithashtu kishte bërë “200 marrëveshje” që do të përfundoheshin brenda tre deri në katër javësh, megjithëse nuk pranoi të jepte detaje specifike.
Ai tha se do ta konsideronte një “fitore të plotë” nëse tarifat do të ishin ende 20% deri në 50% në vit nga tani e tutje.
Presidenti Trump argumentoi se barrierat e tij tregtare do të ringjallnin industritë prodhuese amerikane që janë dobësuar nga konkurrenca globale.
Megjithatë, ekonomistët paralajmërojnë gjerësisht se ato do të çonin në çmime më të larta për konsumatorët amerikanë dhe do të rrisnin rrezikun e një recesioni. //a.i/ ATSH