Demiraj udhëton nga Tirana në Prishtinë për të uruar Albin Kurtin për fitoren dhe ditën e Pavarësisë

Ish-ministri Dritan Demiraj i kthyer së fundmi nga SHBA-ja për të dhënë kontributin e tij në referendumin e 25 prillit, ka udhëtuar nga Tirana në Prishtinë për të uruar Albin Kurtin për fitoren dhe ditën e Pavarësisë së Kosovës.

“Në këtë prag feste për 13 vjetorin e Pavarësisë së Kosovës erdha të uroj mikun tim dhe fituesin ballëlart të frymës së re politike shqiptare, Kryeministrin Albin Kurti dhe z. Liburn Aliu.

Takimet me të janë gjithmonë shpresëdhënëse, pasi me udhëheqës të tillë vendi ynë do të bëhet shembull për të mos u përkulur në asnjë mënyrë kur përballesh me mbrojtjen e parimeve dhe vizionit për një vend të lirë e plot shpresë për bashkëkombasit e saj.

Si gjithmonë z. Kurti konfirmoi mbështetjen e fuqishme, pa rezerva si dhe dëshirën që të bashkëpunojmë ngushtë në ndërtimin e një shteti të dinjitetshëm ë të dy anët e kufirit Shqiptar, sidomos pas fitores historike pas 25 Prillit nën drejtimin e z. Lulzim Basha.

Gjithashtu me këtë rast pata mundësinë që të vizitoj edhe familjen e vëllait dhe mikut tim të ngushtë Gjeneral Rexhep Selimi, i cili gjendet në një tjetër betejë për të mbrojtur drejtësinë dhe emrin e pastër të UÇK-së.

Takimi me vëllezërit dhe familjarët e tij më dhanë shumë emocione sepse pashë se me sa dinjitet, përkushtim dhe atdhedashuri ata vazhdojnë të qëndrojnë edhe në këtë sakrificë të fundit.

Kjo është hera e parë që vizitoj Kosovën pa patur mundësi që ta përqafoj dhe të ulem me Gjeneral Rexhep Selimin në Prishtinën që ai e do sa shumë.

Zoti i bekoftë Shqiptarët në Kosovë dhe kudo!

D.D. Prishtimë, Kosovë”, shprehet përmes rrjeteve sociale, Dritan Demiraj.