Situata në Theth vijon të jetë e tensionuar, mes përplasjeve të banorëve me autoritetet për prishjen e ndërtimeve pa leje. Sot, deputetët e Partisë Demokratike për qarkun Shkodër, Luçiano Boçi dhe Bardh Spahia, janë përfshirë në një konfrontim me forcat e policisë gjatë një vizite në zonë për të mbështetur banorët vendas.
Në një video të publikuar nga vetë Boçi në rrjetet sociale, ai shfaqet duke debatuar ashpër me disa efektivë policie dhe duke u përplasur verbalisht me një person që, sipas deputetit, është drejtori i Policisë së Shkodrës, Fatmir Lleshaj. “Çfarë drejtori je ti? Ku e ke bexhin?”, dëgjohet të thotë Boçi në video, ndërsa më pas konfliktohet edhe me një tjetër efektiv të pranishëm në vendngjarje.
Tensionet në fshatin turistik kanë nisur prej disa ditësh, pas fillimit të operacionit të IKMT-së për prishjen e ndërtimeve të ndërtuara pa leje. Banorët kundërshtojnë veprimet e institucioneve, duke deklaruar se nuk kanë mundësi të pajisen me leje ndërtimi për shkak të mungesës së certifikatave të pronësisë.
