Deputeti i Partisë Socialiste, Ardit Bido, ka reaguar ndaj deklaratës së OMONIA-s në mbështetje të Redi Muçit dhe Lëvizjes Bashkë, duke e cilësuar këtë qëndrim si një tregues të afërsive politike dhe ideologjike mes tyre.
“Çfarë lidhjeje ka OMONIA dhe Vangjel Dule me Redi Muçin dhe Lëvizjen Bashkë?”,-shtron pyetjen Bido, ndërsa shton se është e vështirë të kuptohet pse një organizatë që përfaqëson minoritetin grek do të mbështeste një lëvizje që ai e konsideron “marksiste dhe neokomuniste”. Deputeti socialist theksoi se qëndrimi i tij nuk lidhet me kundërshtimin e minoritetit grek, duke nënvizuar se marrëdhëniet e tij me komunitetin minoritar kanë qenë gjithmonë korrekte.
“Nuk kam pasur dhe nuk kam asnjë qëndrim kundër minoritetit grek. Marrëdhëniet me komunitetin minoritar në jug të vendit kanë qenë gjithmonë korrekte”, është shprehur ai. Sipas Bidos, reagimi i OMONIA-s nuk ka qenë i papritur, pasi prej ditësh ai ka ngritur publikisht shqetësime për ato që i konsideron teza dhe qëndrime problematike të promovuara nga organizata dhe aktorë të caktuar politikë.
Duke iu referuar protestës që ka nxitur debatin, ai tha se bëhet fjalë për një lëvizje qytetare të mbështetur mbi shqetësime reale të banorëve dhe se ajo nuk duhet të përdoret për interesa të tjera. “Kjo është një protestë qytetare dhe energjike, e ndërtuar mbi shqetësimet reale të banorëve. Ajo nuk duhet të devijohet për interesa politike apo ideologjike që nuk kanë lidhje me kauzën fillestare”, deklaroi Bido.
Ai e konsideroi daljen publike të OMONIA-s në mbështetje të Redi Muçit si një konfirmim të pretendimeve që ka ngritur më herët. “Mbështetja publike e OMONIA-s për Redi Muçin dhe për tezat që kam denoncuar prej ditësh është një provë që flet më qartë se çdo argument tjetër”, u shpreh deputeti.