Deputeti Bido thirrje protestuesve: Bllokimi i institucioneve është tentativë për grusht shteti

Përplasjet e dhunshme që ndodhën këtë të enjte para Parlamentit, të shoqëruara me përdorimin e sprejit lotsjellës, ujit me presion nga policia dhe hedhjen e gurëve e sendeve të forta, kanë shkaktuar reagime të forta në politikë. Deputeti i PS, Ardit Bido, iu drejtua aktivistëve të pranishëm në studio, duke deklaruar se ata nuk përfaqësojnë shumicën e shqiptarëve. Sipas tij, përpjekja për të bllokuar funksionimin e institucioneve përbën një tentativë për grusht shteti.

”Policia duhet të kritikohet, sepse në një demokraci monopolin e përdorimit të forcës e ka shteti dhe jo individët. Kjo është normale dhe duhet të funksionojë sipas ligjit. Nga ana tjetër, ju nuk mund të pretendoni se jeni përfaqësues të shqiptarëve. Në shesh ka qytetarë me kërkesa, disa prej të cilave janë legjitime, por të pretendosh se përfaqëson popullin dhe të tentosh të ndalosh funksionimin e institucioneve do të thotë të krijosh anarki.

Ju nuk mund të na impononi vullnetin tuaj dhe të përpiqeni të na intimidoni. Sot pamë deputetë që u goditën me vezë, pati hedhje gurësh dhe sulme edhe ndaj policisë. Për mua, kjo është një tentativë për grusht shteti. Nuk mund të bllokohet funksionimi i institucioneve nga një grup i vogël protestuesish. Demokracia dhe deputetët nuk intimidohen. Përpjekja për të bllokuar funksionimin e institucioneve përbën një tentativë për grusht shteti”.-tha në emisionin “Të Paekspozuarit”.