Deputeti Erald Kapri nga Strasburgu: Eurodeputetët të shqetësuar për luftën ndaj korrupsionit në Shqipëri

Deputeti i Partisë Mundësia, Erald Kapri thotë se eurodeputetë dhe zyrtarë të lartë europianë kanë shprehur shqetësim për situatën në Shqipëri, veçanërisht sa i përket luftës kundër korrupsionit dhe pavarësisë së drejtësisë.

Në një lidhje nga Parlamenti Europian në Strasburg, Kapri tha se gjatë takimeve të zhvilluara në ditët e fundit, një nga çështjet që ka ngjallur reagim tek zyrtarët europianë ka qenë votimi në Kuvend kundër heqjes së imunitetit të ish-zv/kryeministres Belinda Balluku.

”Në takimet që kam zhvilluar kanë shprehur shqetësim për luftën ndaj korrupsionit dhe pavarësinë e gjyqësorit. Për shumë nga ata eurodeputetë dhe zyrtarë që kam folur ka qenë e papranueshme votimi kundër heqjes së imunitetit të Belinda Ballukut në Parlament”, u shpreh Kapri.

Kapri theksoi se mbështetja e partnerëve europianë për Shqipërinë mbetet e madhe, por paralajmëroi se sjellja e mazhorancës mund të krijojë probleme serioze nëse vazhdon në të njëjtën linjë. ”Ne kemi hapur negociatat, por sfida është mbyllja e tyre. Nëse do krijojmë pengesa të tilla, të çojmë sinjale në Bruksel duke mbrojtur të korruptuarit, integrimi ynë vendoset në rrezik”, deklaroi ai.