Nënkryetari i grupit parlamentar të PS-së, Erion Malaj ka marrë pjesë në një takim në Parlamentin Europian, në konferencën ‘Zgjerimi i Bashkimit Evropian për një Brez të Ri: Fuqizimi i të Rinjve’.
Përmes një postimi në rrjetet sociale, Malaj shkruan se gjatë fjalës së tij theksoi se procesi i zgjerimit të BE-së për Shqipërinë, është një rrugëtim transformimi i vendit. Sipas Malajt, nuk janë shtetet që hyjnë në Bashkimin Europian, por janë njerëzit. Ai shtoi se sfida më e madhe e Shqipërisë është rinia e vendit tonë, prandaj sipas tij, detyrë e qeverisë së PS është që ta bëjnë Europën reale për ta, pa humbur kohë.
“I nderuar të isha i ftuar në Parlamentin Evropian në Bruksel dhe folës në konferencën ‘Zgjerimi i Bashkimit Evropian për një Brez të Ri: Fuqizimi i të Rinjve’. Si përfaqësues i Partisë Socialiste, theksova se zgjerimi për Shqipërinë është një rrugëtim transformimi. Nuk janë vendet që hyjnë në BE, por janë njerëzit, janë brezat. Dhe sot, sfida më e madhe është rinia jonë. Prandaj, detyra jonë është ta bëjmë Evropën reale për ta pa humbur kohë”, ka shkruar Malaj në rrjetet sociale.
