Deputeti i PD, Spahia: Duhet larguar Rama, ka dhënë prova se nuk organizon zgjedhje të lira

Deputeti i PD, Bardh Spahia thotë se objektivi kryesor dhe më emergjent është largimi i Edi Ramës nga pushteti dhe heqja e mundësisë që ai të organizojë zgjedhje, pasi ai ka dhënë prova se i vjedh ato.

”Duke kërcënuar komisionerët, duke kërcënuar votuesit e Partisë Demokratike, të shoqëruar nga Policia e Shtetit. Dhe po flasim vetëm për ditën e zgjedhjeve, ato të dukshmet, nuk po flasim për muajin e fushatës elektorale ku demokratët, anëtarët e Partisë Demokratike, votuesit e Partisë Demokratike, janë kërcënuar dhunshëm nga grupet kriminale”, tha Spahia në A2 CNN.

Në pritje të largimit të Ramës, PD rikonfirmoi përmes një referendumi kryetarin Sali Berisha. Megjithatë, një pjesë e rivalëve të brendshëm e kanë quajtur procesin nul dhe kanë paralajmëruar përballje ligjore në gjykatën e Tiranës.

A rrezikon sërish të futet në një konflikt ligjor Partia Demokratike? ”Partia Demokratike tashmë do të vijojë me proceset e veta të cilat i parashikon statuti i partisë. Sigurisht janë të lirë të vazhdojnë me kontestimet e tyre kushdo që ka kontestime, por besoj se nuk ndikon. Anëtarësia ka folur qartë dhe në mënyrë unanime pothuajse, ka shprehur vullnetin e saj në mbështetje të Profesor Doktor Sali Berishës. Le të vazhdojmë me padinë. Nuk ka as edhe një problem. Të gjitha diskutimet e tjera apo referimet në institucionet të çfarëdo lloj niveli janë të tepërta për sa kohë është shpreh qartazi anëtarësia”.