Deputetja e PS-së, Sara Mila thotë se protesta është larguar nga qëllimi fillestar që e solli në vëmendjen publike. Sipas Milës, protesta nisi si një lëvizje kundër një projekti të caktuar dhe me fokus mbrojtjen e një zone të mbrojtur, por me kalimin e kohës është shndërruar në një lëvizje me objektiva të qarta politike.
”Protesta e ka humbur busullën. Ajo nisi si një lëvizje për një projekt konkret, ku mbrojtja e zonës së mbrojtur ishte kryefjala dhe arsyeja kryesore që i mblodhi njerëzit. Nëse ajo ishte pika nga e cila nisi gjithçka, atëherë duhej të mbetej edhe kërkesa kryesore, ajo pikë shkoj te kërkesa e parafundit. Por sot ajo është lënë në plan të dytë dhe protesta ka marrë një drejtim krejtësisht politik’‘,-tha Mila në emisionin ”Të Paekspozuarit”.
Deputetja socialiste tha se artikulimi i kërkesave të fundit tregon se lëvizja ka pasur tashmë një orientim të qartë politik. ”Kemi një artikulim politik të drejtpërdrejtë nga vetë organizatorët. Kjo tregon se lëvizja paska pasur një iniciativë krejt tjetër nga ajo që u prezantua në fillim. Nëse kjo është një lëvizje politike dhe ka kaluar nga kërkesat fillestare në një organizim të mirëfilltë politik, atëherë le të bëhet politikë. Nëse kjo është opozita politike që kërkon të përballet me Partinë Socialiste, atëherë vendi ku duhet të garohet janë zgjedhjet. Aty matet mbështetja qytetare dhe aty zhvillohet konkurrenca politike”.
