Deputetja socialiste nga Brukseli, Sara Mila: Shqipëria sot një mundësi historike. Mesazhet nga Europa janë shumë të mira

Aktualitet E Mërkurë, 1 Korrik 2026 19:38

Pas vizitës në Bruksel me Grupin e Deputetëve të Rinj të Kuvendit të Shqipërisë dhe takimit me raportuesin për Shqipërinë në Parlamentin Europian, Andreas Schieder, deputetja socilaiste e Elbasanit, Sara Mila, shkruan se vendi ynë ka të gjitha mundësitë për t’i mbyllur negociatat e anëtarësimit brenda vitit 2027.

“Mesazhi që morëm prej tij ishte i qartë, pozitiv dhe inkurajues: Shqipëria është në drejtimin e duhur dhe ka të gjitha mundësitë për të mbyllur negociatat me Bashkimin Europian brenda vitit 2027”, shkruan Mila, e cila thekson se mesazhet nga Europa janë më shumë sesa pozitive për këtë proces. “Shqipëria sot ka një mundësi historike. Mesazhet nga Europa janë më shumë se të mira. Tani na takon neve ta kthejmë këtë mundësi në realitet”, thekson ajo.

Duke mos anashkaluar realitetin në vend, Mila shkruan se ky është një mesazh që duhet dëgjuar me vëmendje, sidomos në një kohë kur vëmendja publike është e përqendruar te zhvillime të tjera.

“Përtej dallimeve, ka një objektiv që duhet të na bashkojë të gjithëve, e ardhmja europiane e Shqipërisë”, thekson ajo. Në qendër të diskutimeve ishte dhe përgjegjësia e institucioneve shqiptare për të kontribuar më shumë në procesin e integrimit, duke forcuar reformat, dialogun politik dhe institucionet që u shërbejnë qytetarëve.