Destabilizim në Malin e Zi? Ministri Hoxha i përgjigjet kryeministrit Spajiç: Shqipëria nuk bën pjesë në këto skenarë
Deklaratat e kryeministrit të Malit të Zi, Milojko Spajiç, për një veprimtari të koordinuar hibride që synon destabilizimin e vendit kanë shkaktuar reagim edhe në Tiranë.
Spajiç deklaroi se autoritetet malazeze disponojnë informacione operative për përfshirjen e zyrtarëve nga të paktën dy vende të rajonit në veprime që synojnë të dëmtojnë stabilitetin e Malit të Zi dhe të pengojnë avancimin e tij në procesin e integrimit evropian. Kryeministri nuk i bëri publike emrat e shteteve, por media malazeze “Vijesti” raportoi se bëhet fjalë për Shqipërinë dhe Serbinë.
Përballë këtyre raportimeve ka reaguar ministri për Evropën dhe Punët e Jashtme, Ferit Hoxha, i cili ka mohuar kategorikisht çdo përfshirje të Shqipërisë në veprime të tilla. Hoxha theksoi se ndaj Shqipërisë nuk është paraqitur asnjë akuzë zyrtare, por nënvizoi se Tirana nuk mund të jetë pjesë e një skenari që synon destabilizimin e një vendi fqinj.
“Shqipëria as nuk është dhe as nuk mund të jetë pjesë e ndonjë skenari destabilizues, as në Malin e Zi, një vend fqinj, mik, partner dhe aleat në NATO, me të cilin ndajmë të njëjtin projekt të anëtarësimit në BE, dhe as askund tjetër”, deklaroi ministri Hoxha.
Reagimi i plotë nga ministri Hoxha
Raportimet e mediave janë pjesë e debatit publik. Ne i lexojmë dhe i analizojmë me vëmendjen e duhur, por i marrim me rezervën e nevojshme, aq më tepër kur përmbajnë interpretime të ndryshme apo kontradiktore.
Edhe pse nuk ka asnjë akuzë të formuluar zyrtarisht ndaj #Shqipërisë, dua të theksoj fort dhe qartë se Shqipëria as nuk është dhe as nuk mund të jetë pjesë e ndonjë skenari destabilizues, as në Malin e Zi, një vend fqinj, mik, partner dhe aleat në #NATO, me të cilin ndajmë të njëjtin projekt të anëtarësimit në #BE, dhe as askund tjetër.
Shqipëria dallon sepse bën pikërisht të kundërtën: investon çdo ditë në bashkëpunimin, mirëkuptimin, stabilitetin dhe zhvillimin e rajonit, si dhe në bashkëpunimin më të gjerë evropian e euroatlantik.
Hamendësimet, interpretimet mediatike apo debatet e brendshme politike të një vendi fqinj nuk mund dhe nuk duhet të prodhojnë artificialisht probleme mes dy vendeve tona. Ne jemi në kontakt të vazhdueshëm, në të gjitha nivelet, dhe këtë kam bërë edhe në këtë rast, në komunikimet që kam pasur me ZvKM dhe MPJ, Ibrahimović, si dhe me ZvKM, Nik Gjeloshaj.
Kjo duhet mbajtur parasysh edhe këtu tek ne. Aktorët e ndryshëm, përfshirë ata politikë, janë të mirëpritur të marrin nga MEPJ çdo informacion të nevojshëm për të shmangur debate të panevojshme dhe, mbi të gjitha, për të mos lejuar që politika e jashtme e vendit të kthehet në objekt apo instrument të debateve dhe qasjeve partiake të brendshme.
Politika e jashtme kërkon gjithnjë qetësi, maturi dhe përgjegjësi.
KOHA JONË SONDAZH
