Vilson Çutaj dhe Klement Pepaj rezultojnë të zhdukur që nga 3 tetori në Malësinë e Madhe. Bashkë me ta nuk është parë me edhe Danjel Papaj i cili dyshohet se mund t’i ketë vrarë dhe më pas ka fshehur trupat e tyre.
Zanafilla e ngjarjes ka të bëjë me grabitjen e parcelës së kanabisit të Vilson Çutajt dhe Klement Pepajt. Për këtë ngjarje ata kanë akuzuar Danjel Pepajn të cilin e kanë rrahur dhe e kanë torturuar në fshatin Bajzë deri sa ai është detyruar të pranojë se ka kryer grabitjen.
Pas kësaj të tre ata janë drejtuar më këmbë drejt fshatit Zagore. Gjatë rrugës, në rrethana jo krejt të qarta, dyshohet se Danjel Pepaj ka marrë një armë të fshehur dhe ka qëlluar Vilsonin dhe Klementin.
Burime nga fshati thonë se më herët atë ditë, Danjel Pepaj kishte telefonuar një bashkëfshatar dhe i kishte kërkuar një armë por nuk kishte arritur ta siguronte.
Pas dyshimeve se mund t’i ketë qëlluar Danjel Pepaj dyshohet se ka telefonuar vëllain e tij që ndodhet në Itali duke i treguar se çfarë ka ndodhur dhe duke i thënë se “njërin e kam qëlluar në ballë direkt ndërsa për tjetrin nuk e di nëse ka vdekur apo jo”.
Vëllai i tij dyshohet se i është përgjigjur duke i thënë “spostohu 30 metra dhe qëllo edhe veten se nuk ke çfarë bën më”. Danjel Pepaj ka zbritur nga mali dhe dyshohet se ka shkuar në shtëpinë e tij dhe ka ndërruar rrobat. Më pas një person ka dyshime se e ka shoqëruar nga banesa deri në Zagorë. Aty Danjel Pepaj i ka kërkuar një tjetër personi që ta çojë me makinë drejt Kastratit në Malësinë e Madhe duke paguar një shumë të madhe parash. Që nga ky moment është e paqartë se ku ndodhet Danjel Pepaj i cili mësohet se ka thënë gjithashtu se “jam penduar që nuk kam qëlluar edhe vëllanë e Vilsonit se për ata dy nuk e kam problem”.
Ndërkaq, babai i tij, Rrok Pepaj është ngujuar në shtëpinë e tij pasi familja e Vilson Çutajt i ka dërguar ultimatum për të dorëzuar trupin e djalit dhe të japë sqarime për ngjarjen. Afati i ultimatumit ka mbaruar dy netë më parë. Sipas burimeve kushërinjtë e Vilson Çutaj kanë ardhur nga jashtë Shqipërisë pas kësaj ngjarje të rëndë.
Burime nga fshati Vrith tregojnë se nuk është vjedhur vetëm parcela e Vilson Çutaj dhe Klement Pepaj por edhe dy parcela të tjera që kanë qenë aty afër. Mësohet se Danjel Pepaj ka patur parcelën e tij me cannabis ndërsa Vilson Çutaj dhe Klement Pepaj dyshohet se kanë patur një parcelë veçmas.
Policia vendore e Shkodrës ka kërkuar nga ajri përmes një droni përveç kërkimit fizik por deri më tani ende nuk janë gjetur trupat që mendohen si të vrarë. Nga ana tjetër banorë dhe familjarë janë penguar që të kërkojnë në gjithë territorin malor duke qenë se dyshohet se ka ende parcela atje të cilat këto ditë presin që të korren. Pas korrjes së parcelave pritet që të ketë më shumë shpresë për të gjetur trupat e pajetë.