Dhunohet barbarisht ish-kryetari i PD-së në Lezhë. Autorët i thyen këmbët dhe i prenë veshin

Një ngjarje e rëndë ka ndodhur në Lezhë mbrëmjen e kaluar, ku ish-kryetari i PD-së në njësinë administrative të Dajçit në Zadrimë të Lezhës, është dhunuar.

53-vjeçari, Sokol Toma, është goditur me sende të forta, teksa është dërguar tek Spitali i Traumës për mjekim më të specializuar.

Sipas burimeve nga Spitali i Traumës, agresorët i kanë thyer këmbët dhe i kanë prerë veshin 53-vjeçarit. Ndërkohë zbulohet se Toma është shtruar tek ortopedia.

Ngjarja ka ndodhur rreth orës 22:00 në autostradën Mamurras-Laç, në Sanxhak, teksa autorët i kanë marrë edhe telefonin.

Dyshohet se persona të paidentifikuar e kanë goditur me sende të forta, duke i shkaktuar dëmtime të rënda në trup.

Policia po punon për identifikimin dhe kapjen e autorëve, teksa ende nuk dihen arsyet përse është dhunuar.

Shqipëria ka hyrë prej kohësh në një fazë ku shumë konflikte nuk zgjidhen më me debat apo me institucione, por me dhunë demonstrative. Dhe kur dhuna merr forma kaq të egra, ajo nuk synon vetëm viktimën; synon të krijojë frikë te të gjithë të tjerët.

Prandaj, hetimi i kësaj ngjarjeje nuk është thjesht çështje identifikimi autorësh. Është provë për shtetin. Nëse autorët zbulohen shpejt dhe motivi zbardhet, atëherë institucionet ruajnë autoritetin. Nëse jo, ngjarja do të mbetet si një tjetër sinjal se në disa territore të Shqipërisë, ligji ende sfidohet nga logjika e forcës dhe e intimidimit.