Dom Gjergj Meta për zjarret: Shqetësues fakti që flakët shkaktohen nga dora e njeriut

Zjarret vijojnë të përbëjnë një kërcënim serioz në zonat e Tenës dhe Kodër Rrëshenit, në bashkinë Mirditë. Flakët janë përhapur me shpejtësi, të favorizuara edhe nga erërat e forta.

Ipeshkvi i Rrëshenit, Dom Gjergj Meta, e ka cilësuar situatën tepër shqetësuese. Në një prononcim për Report TV, ai deklaroi se shqetësimi shtohet edhe më shumë nga dyshimet se vatrat e zjarrit janë shkaktuar qëllimisht nga njerëzit.

Dom Gjergj Meta i bëri thirrje institucioneve shtetërore që të angazhohen me të gjitha kapacitetet për përballimin e situatës dhe shuarjen sa më shpejt të vatrave të zjarrit.

”Ajo që është më shqetësuese, është që këtu duket se këtu është dora e njeriut. Fakti që njerëzit vendosin zjarrin, prishin pyjet dhe dëmtojnë jo vetëm natyrën, por edhe jetën e njerëzve dhe shtëpitë e tyre. Kjo e bën shqetësues shumë faktin.

U bë disa ditë që jemi në situatë alarmante në gjithë Shqipërinë. Ajo që unë kam nga vetja ime është një apel ndaj të gjithë njerëzve, që të jemi të kujdesshëm, të mos e dëmtojmë vetë natyrën dhe ta ruajmë atë.

I bëj thirrje të gjitha institucioneve që të përpiqen maksimalisht dhe t’i shuajmë të gjitha vatrat e zjarrit. Këtu shoh që njerëzit janë në këmbë të gjithë për të shuar zjarret dhe për të garantuar jetët e njerëzve”, tha mes të tjerash Ipeshkvi i Rrëshenit, Dom Gjergj Meta.