Drejtori i AMP-së, Qose vlerëson këshilltarin amerikan Richard F. Bates në rritjen e standardeve

Drejtori i Përgjithshëm i Agjencisë së Mbikëqyrjes Policore (AMP), Klevis Qose, zhvilloi takim me stafin e institucionit dhe Richard F. Bates, Këshilltar për Llogaridhënien Policore pranë programit ICITAP të Departamentit Amerikan të Drejtësisë, në kuadër të përfundimit të angazhimit të tij në Shqipëri.

Në takim morën pjesë gjithashtu Richard Deasy, atashe për Asistencën në Çështjet e Zbatimit të Ligjit pranë Ambasadës së Shteteve të Bashkuara të Amerikës në Tiranë, si dhe Ellen Alegranti, drejtoreshë e Byrosë për Çështjet Ndërkombëtare të Narkotikëve dhe Zbatimit të Ligjit (INL).

Gjatë takimit, Qose vlerësoi kontributin e rëndësishëm të Bates përgjatë pesë viteve të bashkëpunimit me AMP-në, duke theksuar rolin e tij në forcimin e kapaciteteve profesionale të institucionit, zhvillimin e programeve të trajnimit dhe promovimin e standardeve më të mira të integritetit dhe llogaridhënies policore.

“Përgjatë këtyre pesë viteve, Richard ka qenë jo vetëm një këshilltar i vyer, por edhe një partner i besueshëm në përpjekjet tona për të forcuar më tej profesionalizmin dhe standardet e AMP-së. Kontributi i tij ka lënë gjurmë të rëndësishme në zhvillimin e institucionit tonë dhe do të mbetet i vlerësuar nga i gjithë stafi”, u shpreh Qose.

Nga ana e tij, Richard F. Bates u shpreh i emocionuar për bashkëpunimin e ndërtuar me AMP-në dhe marrëdhëniet e krijuara gjatë qëndrimit të tij në Shqipëri.

“Ka qenë një privilegj i veçantë të punoj krah për krah me profesionistët e AMP-së. Do të largohem me kujtime të jashtëzakonshme, me respekt të madh për kolegët dhe miqtë që kam gjetur këtu. Shqipëria do të më mungojë shumë dhe do të mbetet gjithmonë një vend i veçantë për mua”, tha Bates.