Drejtori Proda pret përfaqësuesit e EU4LEA dhe CIVIPOL: Rrisim bashkëpunimin për modernizimin e Policisë

Drejtori i Përgjithshëm i Policisë së Shtetit, Drejtues Madhor Ilir Proda, priti sot në një takim Francesca Varlese, Menaxhere e Programit në Delegacionin e BE në Tiranë, Giovanni Pasqua, Koordinator Ndërkombëtar i projektit EU4LEA, si dhe Thierry Vignes, Ekspert i Përhershëm Ndërkombëtar për Format Evolutive të Krimit të Organizuar dhe Policinë Shkencore, i emëruar nga CIVIPOL.

Drejtori i Përgjithshëm falënderoi përfaqësuesit për mbështetjen e vazhdueshme të dhënë ndër vite, që nga misioni PAMECA dhe programi EU4LEA, për rritjen e kapaciteteve profesionale të oficerëve të Policisë së Shtetit, nëpërmjet trajnimeve dhe asistencës teknike.

Ai theksoi vendosmërinë e Policisë së Shtetit për të bashkëpunuar ngushtë me partnerët ndërkombëtarë me qëllim rritjen e mëtejshme të cilësisë së shërbimit dhe forcimin e kapaciteteve operacionale. ”Policia e Shtetit mirëpret çdo asistencë që kontribuon në profesionalizimin dhe modernizimin e strukturave tona”, u shpreh Proda.

Nga ana tjetër, përfaqësuesit e EU4LEA shprehën vlerësimin për bashkëpunimin e deritanishëm dhe gatishmërinë për vijimin e projektit në fazën e tij të dytë, EU4LEA 2. Ata garantuan se mbështetja për Policinë shqiptare do të jetë akoma më e madhe në vijim.

Projekti EU4LEA 2, ndërtohet mbi arritjet e fazës së parë dhe synon të rrisë performancën operacionale të institucioneve shqiptare në luftën kundër krimit të organizuar dhe korrupsionit.

Ky projekt zbatohet në bashkëpunim nga Ministria e Brendshme italiane, CIVIPOL (Francë) dhe GIZ (Gjermani), me bashkëfinancimin e Bashkimit Europian dhe Ministrisë Federale Gjermane për Bashkëpunim Ekonomik dhe Zhvillim (BMZ).