Dy shqiptarë dhe një turk prangosen në Rinas, si garantues klandestinësh
Dy shqiptarë edhe një turk janë arrestuar në flagrancë, nën akuzën për dhënien e ndihmës së kalimit të jashtëligjshëm të kufirit.
Ata u prangosën falë operacionit “Mirage 2015” që përfundoi me sukses. Policia kufitare Rinas njoftoi se u vunë në pranga shtetasit shqiptarë, Taip Bardhi, 64 vjeç dhe Ismet Hamitllari, 61, të dy banues në Tiranë, si dhe shtetasi turk Ismail Koparan, 68, banues në Turqi.
“Nga informacionet e grumbulluara nga policia kufitare e Rinasit në bashkëpunim me policinë e shtetit, ka rezultuar se tre shtetasit e sipërpërmendur duke përfituar nga mungesa e regjimit të vizave për hyrjen e shtetasve turq në Republikën e Shqipërisë në bashkëpunim favorizojnë hyrjen e tyre në formën e pritësit e garantit dhe në vijim ndihmojnë shtetasit turq të kalojnë në drejtim te Malit te Zi dhe Serbisë,” – thuhet në njoftimin e policisë. Ata ndihmonin klandestinë për kalimin e paligjshëm të kufirit në drejtim të Hungarisë dhe më pas BE-së.
Në këmbim të kësaj ndihme ata marrin një pagesë prej 3600 eurosh.