Dy trupa të dekompozuar në Vlorë e Librazhd, identifikohet vetëm njëri

Trupi i dekompozuar i një 61-vjeçari, i cili ishte shpallur në kërkim nga policia rreth dy javë më parë, u gjet të dielën në pyllin e fshatit Beshisht të Vlorës.  Policia lokale bëri të ditur se, pas sinjalizimit për gjetjen e një kufome, ekspertët e saj shkuan në vendin e ngjarjes dhe bënë të mundur identifikimin. Trupi i pajetë i përket shtetasit S.V, 61 vjeç, banues i fshatit Beshisht. Dyshohet se vdekja e të moshuarit ka ardhur si pasojë e shkaqeve natyrore. Sipas asaj që ka konstatuar paraprakisht mjeku ligjor, në trupin e 61-vjeçarit nuk janë vërejtur shenja dhune, ndërsa nga deklarimet e familjarëve të tij mësohet se S.V. vuante nga shëndeti mendor.  Nga policia e Vlorës, 61-vjeçari ishte shpallur në kërkim, pasi dyshohej se më 15 prill të këtij viti kishte plagosur me thikë bashkëshorten e tij.

Një ditë më parë u gjet në fshatin Babje të Librazhdit nga banorë të zonës, i hedhur në një përrua,një tjetër trup i dekompozuar. Skena horrori terrorizuan fshatin, pasi trupin e dekompozuar e zbuluan më parë qentë e fshatit. Mendohet se trupi i përkiste një vajze që mund të jetë vrarë disa muaj më parë. Por nga fshati Babje nuk ka asnjë vajzë të zhdukuar apo të humbur kohët e fundit, çka dyshohet se vajza mund të jetë vrarë në një zonë më të largët dhe është sjellë pas vrasjes për të hedhur në një përrua të fshatit Babje.