Rruga ballkanike po ringjall sërish shqetësimin e BE-së, kjo për shkak të shtimit të numrit të emigrantëve që po kalojnë prej saj.
Një raport i FRONTEX që u referohet të dhënave të emigrimit për nëntë muajt e vitit 2022, tregon se vetëm në shtator u evidentuan 19.160 persona, dy herë më shumë se e njëjta periudhë e një viti më parë.
Shqipëria është pjesë e Rrugës Ballkanike ku emigrantët e parregullt hyjnë nga Greqia dhe udhëtojnë drejt vendeve perëndimore duke kaluar drejt Malit të Zi apo përmes Portit të Durrësit për në Itali.
Me shqetësim, raporti evidenton tendencat e emigrimit të paligjshëm janë shfaqur edhe përmes hapësirës detare nga Vlora në brigjet italiane.
Në muajin gusht ndërkohë, mediat britanike shkruanin se 40% e emigrantëve që hynin në Mbretërinë e Bashkuar me gomone, ishin nga Shqipëria. Vitin e kaluar, sipas të dhënave qeveritare, La Manshin e kaluan 757 shqiptarë.