“E hodhën të gjallë në rezervuar”/Si u vra 50-vjeçarja nga nipi i burrit dhe dy shokët

Zbardhen detaje nga krimi tronditës i ndodhur më 5 janar në fshatin Gjerbës të Mallakastrës, ku u vra 50-vjeçarja Drita Saliaj. 50-vjeçarja është vrarë nga nipi i bashkëshortit të saj dhe dy shokët e tij. Vdekja dyshohet se ka ardhur nga mbytja. Autorët, e kanë futur të gjallë brenda në rezervuar, por të lidhur këmbë e duar me litarë. Sipas dëshmive të banorëve të zonës, familja Saliaj kishte një gjendje të mirë ekonomike dhe tre autorët e dyshuar janë futur në banesë për të vjedhur. Mirëpo, pasi janë futur në ambjentet e brendshme të shtëpisë janë ndeshur me 50 vjeçaren dhe nuk kanë gjetur paratë që do të vidhnin. Të arrestuarit janë Luiz Saliaj, 16-vjec dhe është nipi i burrit të viktimës, Sindi Shehaj 16-vjeç dhe Ervis Zotaj 26-vjeç, banues në Gjerbës, Mallakastër.

Njoftimi i policisë:

Policia zbardh në kohë rekord ngjarjen e ndodhur në datë 05.01.2020 në fshatin Gjerbës. Arrestohen 3 shtetas të dyshuar si autorë të vrasjes së 50 vjeçares. Në orët e para të mëngjesit të sotëm, në Komisariatin e Policisë Mallakastër janë paraqitur familjarët e shtetases D. S, 50 vjeçe, të cilët denoncojnë largimin nga banesa të 50-vjeçares. Pas marrjes së denoncimit, shërbimet e Komisariatit të Policisë Mallakastër në bashkëpunim me strukturat policore të Drejtorisë Vendore të Policisë Fier organizuan punën dhe në kohë rekord zbardhën ngjarjen.

Pas hetimeve të kryera rezultoi se nipi i shtetases së humbur( djali i vëllait të burrit), në bashkëpunim me 2 shokë të tij, në datën 05.01.2020 kanë shkuar për të vjedhur në banesën e 50-vjeçares dhe pas rezistencës të hasur nga kjo e fundit, e kanë hedhur në rezervuarin e fshatit Gjerbës. Në vijim të punës për zbardhjen e plotë të ngjarjes, nga shërbimet e policisë Mallakastër dhe Polumbarët e Repartit Special Renea u gjet në rezervuar trupi i pajetë i shtetases D. S.

Specialistët për Hetimin e Krimeve të Rënda në Drejtorinë Vendore të Policisë Fier, arrestuan shtetasit: L. S., 16 vjeç, banues në Gjerbës,.S. Sh., 16 vjeç, banues në Çërrillë, dhe E. Z., 26 vjeç, banues në Gjerbës, Mallakastër. Materialet do i kalojnë Prokurorisë pranë Gjykatës së Shkallës së Parë Vlorë për veprime të mëtejshme.