E ktheu shtëpinë në magazinë droge, shpallet në kërkim pronari nga Zall Heri

Policia e Tiranës ka zbuluar një sasi droge në një banesë të përshtatur si magazinë për tharjen e kanabisit, në Zall Her.

Burime nga policia e Tiranës bëjnë të ditur se në bazë të informacioneve të marra u ushtrua kontroll në banesën në pronësi të shtetasit Shefqet Lozi, ku u gjetën degë hashashi në proces tharjeje dhe disa boçe.

Policia shpalli në kërkim pronarin e banesës së përshtatur si magazinë për tharjen e bimëve narkotike, ndërsa asgjësoi në vend bimët që u gjetën në banesë, me sasi rreth 50 kg.

Ndërkohë, policia po punon për të identifikuar edhe persona të tjerë të përfshirë në veprimtarinë kriminale.