Një 17-vjeçar shqiptar ka humbur jetën në mënyrë tragjike mbrëmjen e djeshme në provincën e Caserta, në Itali. Endri Cania ndërroi jetë si pasojë e një arresti kardiak pas një rënie të tmerrshme.
Siç raportojnë mediat italiane, Endri ishte me disa shokë kur ra nga një mur dhe përplasi rëndë kokën. 17-vjeçari kishte humbur vetëdijen dhe u dërgua në një shtëpi aty pranë.
Prindërit e Endrit, të cilët prej kohësh punojnë në itali në bujqësi, u shqetësuan për djalin e tyre. I pari që ndërhyri për të shpëtuar 17-vjeçarin ishte një mjek, shumë i njohur në qytet, i cili u përpoq të kryente masazh kardiak. Megjithatë, për Endrin nuk kishte asgjë për të bërë më. As ndërhyrja e ambulancës nuk shërbeu për t’a shpëtuar atë nga vdekja.
