Edi Rama, një program ambicioz. Mbetet ta vëzhgojmë në katër vite!

Nga Jonida Halili-

Kryeministri Rama paraqiti sot në Kuvendin e Shqipërisë programin politik të qeverisë së tij për mandatin 2021-2025.

Pikat kyçe të asaj që paraqiti kyeministri janë:

Së pari një strategji ekonomike për zhvillimin e turizmit, ku synon që Shqipëria të kthehet në qendër të madhe turistike të Rajonit.

Së dyti, ndërtimin e aksit kryesor strategjik nga Muriqani në Rrogozhinë që mbetet pjesë e Koridorit Blu. Kjo nënkupton lidhjen e Shqipërisë me BE me anë të rrugës tokësore të nivelit europian.

Së treti, vendosjen e rregullave strikte për mjedisin, pasi ndikon në turizëm dhe në shendetin e shqiptarëve. Pas 1 qershorit 2022 nuk do lejohet asnjë qese plastike në vend si dhe nëse një bashki nuk mban pastër mjedisin nuk do të përfitojë asnjë lekë donacion e projekte.

Së katërti, në fushën e energjitikës dhe transportit, kryeministri tha se do të ketë zhvillime të forta në këtë sektor.

Së pesti, ai premtoi rritjen e pagave në administratë dhe në sektorin privat. Ndërsa për pensionet tha, por nuk e premtoi 100 %, se do ti rrisë në masën më të madhe të mundshme.

Se gjashti, kryeministri tha se në sektorin e shendetsisë do kemi investime të mëdha. Dhe se në këtë sektor do ketë zhvillime te nivelit te BE.

Së shtati, kryeministri garantoi se nuk do ketë sherr me opozitën, por jo nën presion.

Së teti, Edi Rama sqaroi se Shqipëria do rrisë ndikimin e saj diplomatik në Rajon dhe më tej

Së nënti, kryeministri premtoi se do të rrisë prezencën e Shqipërisë në botë për të njohur Kosovën. Në këtë pikë ai tha se duhet se Kosova dhe Shqipëria të merren vesh miqësisht dhe vëllazërisht me njeri tjetrin, por pa cënuar autoritetet respektive.

Së dhjeti, Rama tha se do të jetë i vendosur në udhën e “Open Balkan”. Nuk ka asgjë që nuk na ndal në këtë drejtim.

Këto ishin prioritetet kryesore të kryeministrit Rama.

Në pamje të parë duken premtime dhe strategji dinjitoze. Mbetet të vëzhgojmë se si dhe kur do ti realizojë kryeministri Rama.