33-vjeçari Arjan Sala, i propozur tashmë për titullin “Dëshmor i Atdheut”, sakrifikoi veten për të shpëtuar të tjetër. Ekspertiza paraprake ka zbuluar se zjarri është ndezur për shkak të një shkëndije elektrike në kabllin e një llampe neoni. ”Report Tv” raporton se shkëndijat e ndezura pas defektit kanë rënë mbi disa rroba sintetike duke hapur flakë të shumta.
Flakët e para janë pikasur rreth orës 15:00 teksa punëtorët e ”Casa Italias-s”, ishin duke pritur kamionin e mbushur me mallra. Në fillim kanë qenë punonjësit e sigurisë mes tyre edhe 33-vjeçari që kanë hyrë për të shuar flakët. Ata ia dolën të shuanin flakët fillimisht, por jo vatrën dhe për pasojë, zjarri u riaktivizua disa minuta më pas.
Arjan Sala ishte personi që hyri në brendësi të magazinës për të shuar flakët dhe tentoi të dilte nga dera e emergjencës por errësira dhe tymi e penguan dhe ai u rrëzua.
Trupi i tij u gjet dje, 3 ditë pas zjarrit që ra tek qendra tregtare. Ekspertiza paraprake zbuloi se i riu ka qëndruar rreth 24 orë gjallë, por më pas nuk ia ka dalë dot më. Ai la pas një vajzë të mitur.