Ekzekutohet në makinë me 14 plumba, viktima shkoi të pinte kafe

Mëngjesi i kësaj të marte ka nisur me një ekzekutim në Rrogozhinë. Viktima është 33-vjeçari, Klevis Kapllani i cili u vra shumë pranë shtëpisë së tij në fshatin Sinaballaj të Rrogozhinës, rreth 200 metra larg banesës. Trupi i tij i pajetë u gjet në makinë, rreth orës 06:00. Ka qenë shitësi i qumështit të fshatit, i cili ka gjetur të pajetë 33-vjeçarin.

Kapllani kishte dalë mbrëmjen e djeshme rreth orës 21:00 për të konsumuar një kafe, por nuk u kthye më i gjallë. Mësohet se ai është qëlluar me 14 plumba, ndërsa në vendngjarje është gjetur një armë por ende nuk dihet nëse i përket autorëve apo viktimës.

Tezja e Klevis Kapllani, ka bërë me dije se i riu ka pasur një ekspuls në Itali në vitin 2007 por pa dhënë shumë detaje. “Dimë ka pasur ekspuls në Itali në 2007. E kam çun motre”, ka thënë ajo. Ndërkohë, një tjetër familjar i të riu, është shprehur se e mori vesh lajmin nga mediat. “Ka qenë në Itali më shumë, s’di të ketë ndonjë problem. E kam marrë vesh lajmin nga TV”, ka thënë ai.