Kryetare e Kuvendit të Shqipërisë ka publikuar në profilin e saj në Facebook një kumtim për librin e gazetarit Ilir Ikonomi, “Rebeli” kushtuar jetës dhe veprës së Fan Nolit.
“Rebeli” i Ilir Ikonomit është një rrëfim i fuqishëm për jetën dhe veprimtarinë e një prej figurave më karizmatike të historisë shqiptare, Fan S. Noli. Libri ndriçon një anë më pak të njohur të Nolit, duke e paraqitur atë jo vetëm si peshkop, shkrimtar dhe politikan, por edhe si një rebel intelektual që sfidoi rendin politik dhe shoqëror të kohës.
Noli shfaqet si një njeri me ide të mëdha, një orator brilant dhe një reformator i palodhur, i cili luftoi për të sjellë drejtësi dhe emancipim në Shqipëri. Libri eksploron rolin e tij si lider i Revolucionit të Qershorit 1924, një ngjarje që përbën një moment kyç në historinë moderne shqiptare. Përmes detajeve historike dhe analizës së thelluar, Ikonomi përshkruan betejat politike të Nolit, përpjekjet e tij për të mbrojtur demokracinë dhe vizionin e tij për një Shqipëri më të drejtë dhe më të përparuar.
“Rebeli” përshkruan gjithashtu anën njerëzore të Fan Nolit, dilemat e tij morale dhe sfidat që përjetoi si një emigrant që kërkonte të ruante identitetin e tij shqiptar ndërsa vepronte në një arenë ndërkombëtare. Noli paraqitet si një figurë komplekse, një idealist që shpesh u gjend përballë realiteteve të hidhura politike dhe shoqërore.
Përmes një gjuhe të gjallë dhe një narrative të mbështetur në burime historike të shumta, Ilir Ikonomi sjell një portret të gjallë dhe të thelluar të Fan Nolit, duke e prezantuar atë si një simbol të luftës për liri, drejtësi dhe progres. Libri është një kontribut i vyer për të gjithë ata që duan të kuptojnë më mirë rolin e kësaj figure unike në historinë shqiptare.
Nëse të pëlqen historia dhe portretizimi i figurave të mëdha, ky libër mund të jetë një thesar i vërtetë për ty!
Elisa Spiropali
REBELI
Fort rrallë ndodh të rebelohet një prift, e të bëhet rebel.
Edhe më rrallë të rebelohet një rebel dhe të bëhet prift.
Shqiptaria, sa kryeneçe edhe e paparashikueshme, krahas çudirave dhe çmendurive, kur e ka parë pisk, e ka bërë ndonjë thagmë.
Papë të Romës dhe të Bizantit, luftëtarë me nam botëror, shtetarë gjenialë, shenjtorë, shkrimtarë me famë planetare, janë disa shembuj sa për t’ua kujtuar sot disa të përgjumurve, se ka vërtet nëpër botë shqiptarë që bëjnë punë të thjeshta e të rënda, ama edhe Mbretërit, Papët, Vezirët, Gjenialët, nuk na kanë munguar.
Një nga këto shkrepëtima, apo zjarre, apo ndezje të genit shqiptar, është padyshim i madhi, i paharruari, i pavdekshmi, Fan S. Noli.
Prift, atdhetar, politikan, shtetar, historian, jetëshkrues, poet, shqipërues, Noli i madh bëri atë që s’ka mundur ta bëjë kurrkush deri më sot: Pa i mbetur hatri as Zotit, as Djallit, pajtoi brenda vetes, Priftin me Rebelin.
Jetën e Priftit Rebel, e shkruajti Ilir Ikonomi.
Po Ilir Ikonomi, a është Prift apo Rebel?
Të arrish të thyesh klishetë e soc-historisë, pas qindra, ndoshta mijëra, ditëve e netëve kërrusur mbi libra nëpër biblioteka dhe arkiva, them se Ilir Ikonomi është të dyja, edhe Prift edhe Rebel.
Aq i vlefshëm është “Rebeli” i Ikonomit sa me ta mbaruar leximin, s’di kujt t’ia ndreqësh e kujt t’ia prishësh, Nolit që bëri gjithato punë për Shqipërinë, apo Ikonomit që e ngriti Nolin nga varri bashkë me punët, ia shkundi baltrat, dhe na dha të lexonim një libër sa qiellor aq edhe demoniak.Përgatiti: AV