Eric Wendt një ushtarak në pension, nominohet nga Trump si ambasador i Amerikës në Shqipëri

Eric Wendt një ushtarak në pension nga Kalifornia, është nominuar si Ambasador i Jashtëzakonshëm dhe Fuqiplotë i Shteteve të Bashkuara të Amerikës në Republikën e Shqipërisë. Njoftimi u bë nga Shtëpia e Bardhë.

Eric Wendt lindi më 7 tetor 1964, në Berkeley të Kalifornisë. Ai komandoi çdo nivel të Forcave Speciale dhe Operacioneve Speciale, nga kapiteni deri te gjenerallejtënant. Ai kaloi katër vjet e gjysmë në Këmbësorinë e Lehtë dhe 30 vjet në Forcat Speciale, duke përfshirë 13 vjet komandë në nivele taktike, operacionale dhe strategjike, ndërsa shërbeu në 56 vende të ndryshme.

Gjatë karrierës, Wendt shërbeu si Ndihmës Kryesor Ushtarak i Sekretarëve të Mbrojtjes Robert Gates dhe Leon Panetta. Ai gjithashtu punoi drejtpërdrejt për Sekretarin e Shtetit të SHBA-së dhe udhëhoqi një koalicion prej tetë vendesh për dy vjet, ndërsa shërbeu si Koordinator i Sigurisë së SHBA-së për Izraelin dhe Autoritetin Palestinez.

Në detyrën e tij të fundit, Wendt komandoi Shtabin e Operacioneve Speciale të NATO-s nga viti 2019 deri në vitin 2021. Ai u tërhoq nga shërbimi më 1 mars 2021, pas 34.5 vitesh shërbimi.