Erion Braçe: Trumpin nuk e rrëzoni nga Sheshi i Tiranës!

Nga Erion Braçe

Sheshi po përdoret nga gjithkush që ka një axhendë. Disa janë primitive dhe të rrezikshme. Të tjera nuk janë dhe nuk mund të jenë axhendat tona. Ato janë toksike dhe po largojnë vëmendjen nga kauzat e drejta. Prandaj them se sheshi ka nevojë për një “detoks”, nëse duam të mbrojmë kauzat që ia vlejnë dhe që kanë bashkuar qytetarët.

AXHENDA POLITIKE

Nuk bëhet fjalë vetëm për praninë e kryetarëve të partive, deputetëve apo kandidatëve për deputetë. Problemi është përpjekja e ricikluar prej më shumë se 30 vitesh për ta shndërruar sheshin në një instrument legjitimimi politik. Është paradoksale që njerëz të cilët vetëm një vit më parë deklaronin se nuk votonin dhe nuk do të votonin, sot kërkojnë ta shpallin Sheshin si organin suprem të vendimmarrjes. Demokracia funksionon përmes institucioneve dhe votës, jo duke zëvendësuar shtetin me turmën. Ky është një koncept primitiv dhe i rrezikshëm, sepse prodhon kaos.

AXHENDA IZOLACIONISTE

Slogane si “Shqipëria e shqiptarëve” apo “Vdekje tradhtarëve” nuk janë patriotizëm. Ato ushqejnë një nacionalizëm primitiv dhe izolues. Kur edhe drejtues të institucioneve financiare me kapital të huaj përdorin një retorikë të tillë, lind e drejta për të pyetur se kujt interesi i shërben. Në një kohë kur Shqipëria negocion anëtarësimin në Bashkimin Evropian, mesazhe të tilla dëmtojnë imazhin, ekonominë dhe perspektivën evropiane të vendit.

AXHENDA E DELEGJITIMIMIT TË DREJTËSISË

Askush nuk duhet ta zëvendësojë drejtësinë me gjykimin e turmës. Ka prej vitesh një përpjekje për të delegjitimuar institucionet e reja të drejtësisë. Politikanë të ndryshëm mund të kenë përgjegjësi penale dhe mund të përballen me akuza, gjykim apo dënim. Por këtë duhet ta vendosin vetëm prokurorët dhe gjykatat, jo sheshi. Një drejtësi e pavarur nuk mund të zëvendësohet nga presioni i rrugës.

AXHENDA EKSTREMISTE

Shfaqja e sloganeve kundër hebrenjve dhe përdorimi i termit “çifutë” në mënyrë fyese është një devijim i rrezikshëm. Është një gjuhë që kujton periudha të errëta të historisë evropiane dhe nuk ka asnjë lidhje me traditën shqiptare. Nuk duhet të ngatërrojmë politikat e një qeverie me një popull apo me një komunitet fetar. Shqiptarët krenohen sepse, në kohët më të vështira, mbrojtën hebrenjtë. Kjo është historia jonë dhe nuk duhet ta mohojmë.

AXHENDA KUNDËR SHBA-së DHE PRESIDENTIT TË SAJ

Është e dukshme se në protestë, si fizikisht ashtu edhe në rrjetet sociale, po tentojnë të imponohen edhe përplasje ideologjike që nuk lidhen me hallet e shqiptarëve. Presidenti Trump nuk fitohet apo humbet në Shqipëri. Për të vendosin qytetarët amerikanë me votën e tyre. Shqipëria nuk duhet të importojë beteja politike të vendeve të tjera, ndërkohë që ka sfidat e saj të brendshme. Nëse protesta dëshiron të ruajë besueshmërinë dhe karakterin qytetar, ajo duhet të çlirohet nga axhendat politike, ekstremiste dhe ideologjike që nuk i përkasin. Vetëm kështu kauzat e drejta nuk do të mbyten nga zhurma e interesave të huaja apo e ambicieve të ngushta politike.