Erjon Alibej merr statusin e bashkëpunëtorit të drejtësisë, zbërthen për SPAK-un disa ngjarje kriminale

Erjon Alibej ka marrë zyrtarisht statusin e bashkëpunëtorit të drejtësisë. Prej disa kohësh, SPAK është duke hetuar në lidhje me disa ngjarje kriminale të rrëfyera prej tij.

Alibej u vu në pranga fillimisht si porositës i disa krimeve të rrëfyera nga Nuredin Dumani, i cili ishte i pari që mori statusin e bashkëpunëtorit të drejtësisë në dosjen e njohur si ”Plumbi i Artë”.

Ai ka dhënë detaje për ngjarje kriminale dhe 2 prej tyre konsiderohen të rëndësishme për Prokurorinë e Posaçme. Prokurorët së bashku me BKH kanë nisur menjëherë verifikimin e deklarimeve për të konstatuar nëse dëshmitë përputhen me provat e deritanishme për ngjarje të caktuara. SPAK po pyet disa persona dhe po mbledh materiale që mund të shërbejnë si prova të rëndësishme për hetimet.