Deklarata e avokatit Alban Duraj se dihet vendndodhja e Bleona Matës, e zhdukur prej 16 vitesh, është kundërshtuar nga avokati i familjes, Idajet Beqiri. Duraj tha në emisionin “Breaking me Fiori Dardha” se Bleona, tashmë 22 vjeçe, është studente ekselente dhe është birësuar nga një çift grek. Por Beqiri i cilësoi këto deklarata si të papërgjegjshme dhe të pabazuara, duke theksuar se Duraj nuk ka lidhje me çështjen.
“Jo vetëm që është e papërgjegjshme, por krijon probleme ligjore. Ua ngacmon plagën padrejtësisht. Ky person nuk ka lidhje, nuk e di pse është futur këtu”, u shpreh ai. Sa i takon nënës së Bleonës, Bukuries, Beqiri tha se ajo është përballur ndër vite me teori të ndryshme për fatin e vajzës. “Dikush thotë është martuar këtu, dikush e gjetëm këtu, dikush thotë është adoptuar. Ka plot teori. Me dhimbje i pret të gjitha, edhe këtë deklaratë, por e di që është një gënjeshtër, mashtrim i madh”, tha avokati.
Sipas Beqirit, hetimet nuk janë në drejtimin e duhur dhe çështja aktualisht është e pezulluar. “Momentalisht është çështje e ‘vdekur’, është e pezulluar, nuk ka ndonjë gjë konkrete në drejtimin e duhur”, deklaroi ai, duke shtuar se pas 16 vitesh ende nuk ka një rezultat konkret për fatin e Bleonës.
