Falsifikon pasurinë e babait të vdekur, bie në pranga me dy zyrtarët e Hipotekës

Tre persona u ndaluan nga policia në Librazhd, pasi falsifikuar dokumentet e pasurisë së një shtetasi, i cili rezultonte i vdekur prej 14 vitesh.

Në pranga përfundoi 55-vjeçari Sali Terziu, ish-hartograf pranë ZVRPP-së Librazhd, 63-vjeçari Jonuz Bardhoshi, topograf privat dhe 56-vjeçari Abdyl Bahiti, i cili ka firmosur në emër të babait të tij të vdekur për një çështje pronësie.

Personi që ka bërë falsifikimin, dyshohet se kishte për qëllim të mos e ndante atë me vëllezërit e motrat e tjerë dhe është denoncuar prej tyre.

Këta shtetas u arrestuan nga efektivat e policisë pasi në vitin 2012, duke shpërdoruar detyrën kanë falsifikuar dokumentet për pasurinë të shtetasit Abdyl Bahiti, banues në Librazhd.

Bahiti u ndalua pasi në vitin 2012 ka aplikuar pranë ZVRPP-së Librazhd për ndarje pasurie dhe në dokumentin e aplikimit ka firmosur në emër të babait të tij, shtetasit SH.B., i cili bazuar në certifikatën e vdekjes, rezulton i vdekur në vitin 1998.

Të tre shtetasit akuzohen për shpërdorim të detyrës dhe falsifikim të dokumenteve.