Fatmir Mediu kundërshton vendimin e GJKKO për rihetimin e tij. Ish-ministri dorëzon rekursin në Gjykatën e Lartë

Ish-ministri i Mbrojtjes Fatmir Mediu kundërshton vendimin e Apelit të GJKKO-së, që i hap rrugën rihetimit të tij për çështjen e Gërdecit.

Mediu ka dorëzuar sot rekursin në Gjykatën e Lartë.

Ndërkaq avokati Ardian Visha në një prononcim për mediat e konsideroi si anti-kushtetues vendimin e Apelit.

Avokati i tij argumenton se vendimi është i cenueshëm, sa kohë një gjykatë e një shkalle më të vogël ka rrëzuar një vendim të Gjykatës së Lartë.

Prokuroria e Posaçme Kundër Korrupsionit dhe Krimit të Organizuar, regjistroi procedim penal ndaj ish-ministrit për veprat penale: “Shpërdorim i detyrës”, kryer në bashkëpunim, si dhe “shpërdorim i detyrës” në bashkëpunim me subjekt ushtarak, kuadër komandues.

Lëvizja erdhi pasi Gjykata e Posaçme e Apelit, GJKKO vendosi më 24 shtator rikthimin për hetim në SPAK të dosjes “Gërdeci”.