Fituesja e Big Brother në protestë, Ceno: Rama të shporret se na lodhi shpirtin

Aktorja Egla Ceno iu drejtua protestuesve kundër qeverisë, duke denoncuar, sipas saj, presionin dhe kërcënimet ndaj qytetarëve që marrin pjesë në protesta. Në fjalën e saj, Ceno tha se qytetarët po përballen me mungesë dinjiteti dhe me presion nga persona që, sipas saj, veprojnë në emër të strukturave partiake.

“Kjo qeveri duhet të zhduket. Këtu janë shqiptarë të ndershëm, ne nuk jemi për kapriço këtu në shesh. Ne kërkojmë dinjitet”, u shpreh ajo. Ceno pretendoi se qytetarët kërcënohen me pasoja në punë nëse marrin pjesë në protesta, duke përmendur edhe familjarët e tyre.

“Nuk ka dinjitet sot, sepse kemi patronazhistë dhe shefë që janë të dërguar nga partia. Kemi patronazhistë që na shantazhojnë se nëse del në protestë të heqim nga puna deri kushëririn e pestë”, tha fituesja e ”Big Brother Albania Vip 3”. Duke iu referuar kryeministrit Edi Rama, Ceno përdori tone të ashpra ndaj tij dhe kërkoi largimin e qeverisë.

“Ky kancer që quhet Edi Rama, ky njeri i neveritshëm duhet të mbathë atletet e neveritshme dhe të shporret, se na lodhi shpirtin”, deklaroi ajo. Në fund të fjalës së saj, aktorja u bëri thirrje protestuesve të ruajnë unitetin dhe të mos përçahen.