Fjalimi dhe ftesa nga Presidenti, studentja rebele tregon se…

Oneda Skënderi, studentja e Fakultetit të Drejtësisë e cila mori vëmendjen e të gjithëve në manifestimin e thirrur nga Presidenti i Shqipërisë, Ilir Meta për mbrojtjen e Kushtetutës, ishte e ftuar pasditen e sotme në “Ftesë në 5” me Bieta Sulon. Ajo sqaroi se nuk është pjesë e asnjë partie politike dhe se pjesëmarrja në protestë ishte në mbështetje të kauzës. E pyetur nga Bieta sesi u gjend krah presidentit Meta, Skënderi tregoi se ftesa i ishte bërë nga organizatorët.

”Mora një ftesë nga organizatorët për të mbajtur një fjalim. Vendosa që të isha pjesëmarrëse duke qenë se e mbështes shumë kauzën dhe e ndjej shumë atë kauzë. Ndaj rashë dakord dhe isha pjesëmarrëse. Kur vendos të dalësh para shumë njerëzve, siç ishin atje, janë disa risqe që duhen marrë përsipër, kështu që unë i pranova ato”.

Ajo deklaroi në shesh se doli të mbrojë vendin si një idealiste. ”Jam këtu jo si ndonjë përfaqësuese e ndonjë partie politike, por si një e re idealiste që nuk do ta braktisë vendin për shkak të paaftësisë apo mungesës së vizionit të disa politikanëve. Të mos respektosh parimet e shtetit të së drejtës dhe funksionimin e tij është të kalosh kufijtë. Të lësh vendin pa Gjykatë Kushtetuese është të kalosh kufijtë. Të mos lësh funksionimin e tre sistemeve është të kalosh kufijtë, të intimidosh mediat, të mos ofrosh shpresë për familjet shqiptare, të rinjtë shqiptarë është të kalosh kufijtë”.