Zjarri në malin e Krujës rrezikoi seriozisht edhe banesat e qytetarëve. Për këtë ngjarje u arrestua një 73-vjeçar, por u la i lirë, pasi prokuroria e konsideroi arrestimin të paligjshëm për mungesë provash. Një tjetër rast është ai i Sami Alliut në Tiranë. Ai dyshohet se në dy ditë të ndryshme ndezi qëllimisht dy zjarre, në Lundër dhe Shkozë. I moshuari u arrestua dhe po hetohet për zjarrvënie të qëllimshme.
Këto janë vetëm dy nga rastet e regjistruara gjatë këtij sezoni. Sipas Policisë së Shtetit, nga 1 qershori deri më 11 gusht janë evidentuar dhjetëra raste ku dyshohet se zjarret janë shkaktuar nga dora e njeriut. Në total, 68 persona janë përfshirë në hetime. Prej tyre, 21 janë arrestuar, 44 po hetohen në gjendje të lirë, ndërsa 3 janë shpallur në kërkim.
Në 7 raste, autorët ende nuk janë identifikuar, ndërsa për 10 zjarre vijojnë hetimet për të përcaktuar nëse kanë qenë të qëllimshme apo janë shkaktuar nga faktorë të tjerë. Ndërkohë, 10 raste janë klasifikuar si aksidentale.
Për zjarrvënien e qëllimshme, Kodi Penal parashikon dënime që varen nga pasojat e shkaktuara. Në rastet më të rënda, veçanërisht kur rrezikohet jeta e njerëzve ose dëmtohet rëndë mjedisi dhe prona, dënimi mund të shkojë deri në 20 vite burg.