Flakët nisën nga plehrat e marketit, 4 persona në pranga. Kompania ndërtuese: Marrim përsipër rindërtimin

Zjarri masiv që shkrumboi një prej godinave të kompleksit ”Arlis” ka lënë pas hi, dhimbje e lot në sytë e banorëve. 30 banesa janë prekur nga flakët, ndërsa dyshohet se shkaku kryesor për përhapjen e flakëve nga kati zero deri katin e 12 (i fundit i ndërtesës) është materiali i fasadës. Dëmet përllogariten të mëdha ndërsa në orët në vijim pritet të bëhet bilanci i plotë.

Dyshohet se zjarri ka nisur nga plehrat e marketit (kryesisht kartonë) të lëna jashtë shumë afër me fasadën e pallatit. Policia ka arrestuar menaxheren e marketit e akuzuar për “Shkatërrim i pronës nga pakujdesia” dhe “Shkelje e rregullave të mbrojtjes në punë”.Në pranga ka rënë dhe administratori i pallatit Agron Cara, kontraktori i fasadës Altin Furtuna dhe inixhineri i kompanisë ndërtuese ‘Arlis’ Enver Ademi, të akzuar për “Shkelje të rregullave të mbrojtjes në punë”. Ndërkohë nën hetim është vënë pronari i kompanisë ‘Arlis’ Armando Lilo, i kontraktuari për ndërtimin e kompleksit ‘Arlis’ Sh, B., dhe 2 punonjëse të marketit.

Ndaj menaxheres së marketit është ngritur akuzë pasi nuk ka marrë masa për heqjen e mbeturinave të kartonit të grumbulluara në pjesën e jashtme. Administratori i pallatit akuzohet se nuk ka marrë masa për funksionalitetin e masave mbrojtëse për shpëtimin e qytetarëve dhe mbrojtjes nga zjarri. Kompania ”Arlis Ndërtim”, në një reagim zyrtar thekson se ndërtimi i objektit është bërë brenda standardeve dhe se i gjithë ndërtimi është certifikuar nga autoritetet përkatëse.

Zëvendëskryeministrja Albana Koçiu vizitoi mëngjesin e sotëm në QSUNT personat e lënduar nga zjarri i pasdites së djeshme, për t’u njohur nga afër me gjendjen e tyre shëndetësore dhe ecurinë e trajtimit. Sipas mjekëve, zjarrfikësit e lënduar paraqiten në gjendje të mirë dhe pritet të dalin nga spitali gjatë ditës së sotme. Gjatë vizitës, zëvendëskryeministrja Koçiu shprehu vlerësim dhe mirënjohje për ndërhyrjen e tyre të guximshme dhe profesionale, e cila mundësoi shpëtimin e jetëve dhe shmangien e pasojave të rënda për banorët e pallatit të përfshirë nga flakët.

Reagimi i kompanisë ”Arlis Ndërtim”

Shoqëria “Arlis Ndërtim” shpk shpreh solidaritetin e saj të plotë dhe mbështetjen e sinqertë për të gjithë banorët e dëmtuar nga ngjarja e fundit që ka prekur objektin në zonën e “Farmacia 10”. Në këto momente të vështira, jemi pranë çdo familjeje të prekur dhe ndajmë shqetësimin për pasojat e shkaktuara. Në funksion të transparencës me opinionin publik, dëshirojmë të sqarojmë se objekti është ndërtuar në përputhje të plotë me lejen e ndërtimit të miratuar nga autoritetet përkatëse, pa asnjë shtesë katesh apo devijim nga projekti i aprovuar, pervec sistemimeve anësore siç janë verandat, të cilat gjithashtu janë miratuar nga organet kompetente. Të gjitha punimet janë realizuar duke respektuar standardet më të larta të ndërtimit dhe sigurisë, në përputhje me legjislacionin në fuqi. Për më tepër, këto punime janë kontrolluar dhe certifikuar nga organet kompetente, duke garantuar përmbushjen e të gjitha kërkesave teknike dhe ligjore.

Dëshirojmë të theksojmë gjithashtu, që për të gjitha punimet e fasadës për objektin në fjalë, shoqëria ka lidhur marrëveshjet respektive me shoqëri tregëtare, të regjistruara pranë Qendrës Kombëtare të Biznesit, të cilët janë zotuar dhe kanë marë përsipër të kryejnë me përgjegjesi të plotë ligjore shërbimet e ofruara dhe të kontraktuara. Në çdo rast shoqëria “Arlis Ndërtim” shpk ka kërkuar para nënshkrimit të kontratës dhe posedon të gjitha çertifikimet e materialeve sipas standarteve europiane dhe legjislacionit në fuqi, të cilat na janë vënë në dispozicion nga kontraktorët që kanë kryer këto punime. Për objektin në fjalë është bërë kolaudimi, çertifikimi si dhe të gjitha procedurat ligjore që prej vitit 2021, duke e dorëzuar me përpikmëri dhe në mënyrë të rregullt tek banorë, në përputhje të plotë me procedurat dhe aktet ligjore në fuqi, çka konfirmon se shoqëria “Arlis Ndërtim” shpk ka përmbushur të gjitha detyrimet e saj kontraktuale dhe ligjore.

Megjithatë, shoqëria “Arlis Ndërtim” shpk pavarësisht se nuk mbart asnjë përgjegjësi ligjore, por në kuadër të përgjegjësisë sociale si kompani, si dhe angazhimit të saj për të qenë pranë njerëzve që e kanë besuar dhe banorëve të prekur, merr përsipër me shpenzimet e saj, rindërtimin e plotë të fasadës së pallatit të dëmtuar nga zjarri si dhe rindertimin e të gjithë apartamenteve të dëmtuara duke i kthyer në gjendjen fillestare, pra në të njëjtat kushte që banorët e kanë marrë apartamentin me çelësa në dorë në momentin e dorëzimit. Ky angazhim synon të kontribuojë në rikthimin sa më të shpejtë të kushteve normale të jetesës dhe në minimizimin e pasojave të kësaj ngjarjeje.

Shoqëria “Arlis Ndërtim” shpk mbetet e hapur për bashkëpunim me institucionet përkatëse dhe grupet e ekspertëve për të sqaruar çdo rrethanë të ngjarjes dhe për të garantuar transparencë të plotë ndaj të prekurve, institucioneve ligjzbatuese si dhe publikut. Njëkohësisht, ritheksojmë angazhimin tonë të vazhdueshëm për të ndërtuar me cilësi, siguri dhe përgjegjësi. Në përfundim, duke shprehur edhe njëherë të gjithë solidaritetin tonë, sigurojmë banorët dhe opinionin publik se Shoqëria “Arlis Ndërtim” shpk do të vijojë të ndjekë me prioritet maksimal çdo hap të nevojshëm për përballimin e kësaj situate dhe për rikthimin sa më të shpejtë e të plotë të funksionalitetit të objektit.