Organizata e Veteranëve të Luftës së Ushtrisë Çlirimtare të Kosovës ka reaguar pas shfaqjes së flamurit me simbolin e UÇK-së gjatë protestës së zhvilluar në Tiranë, duke dënuar përdorimin e tij në akte vandalizmi dhe dhune.
Në reagimin e saj, organizata nënvizon se flamuri i UÇK-së ka një domethënie të veçantë historike dhe kombëtare, pasi simbolizon luftën për çlirimin e Kosovës, dëshmorët dhe sakrificën për liri. Për këtë arsye, sipas saj, ky simbol nuk duhet të lidhet me veprime që cenojnë pronën publike apo private.
Veteranët theksojnë se e drejta për të protestuar është e garantuar për çdo qytetar, por kjo e drejtë nuk mund të shërbejë si justifikim për dhunë, shkatërrim apo plaçkitje. Në të njëjtën kohë, ata u bëjnë thirrje organizatorëve dhe pjesëmarrësve të protestave që të tregojnë përgjegjësi dhe të ruajnë dinjitetin e simbolit të UÇK-së.
“Organizata e Veteranëve të Luftës së UÇK-së dënon çdo keqpërdorim të flamurit me simbolin e Ushtrisë Çlirimtare të Kosovës në akte vandalizmi. Ky simbol përfaqëson Luftën Çlirimtare të Kosovës, dëshmorët e kombit dhe lirinë e fituar nga kjo sakrificë. Si i tillë, kurrë nuk mund të përdoret për të justifikuar, identifikuar apo fshehur veprime që dëmtojnë pronën publike apo private.
Çdo qytetar ka të drejtën e protestës, por asnjë pakënaqësi, sado e thellë të jetë, nuk i jep të drejtë askujt ta lidhë flamurin e UÇK-së me dhunën, shkatërrimin dhe plaçkitjet. U bëjmë thirrje të gjithë organizatorëve dhe pjesëmarrësve të protestave, të ruajnë dinjitetin dhe shenjtërinë e këtij simboli”, thuhet në reagim.
Siç shihet në këtë video nga gazetari i ”Koha Jonë”, Daniel Muçaku, edhe sot flamuri i UÇK-së është përdorur nga të rinjtë, të cilët kanë hipur mbi kazanët e mbetjeve që po digjen.