Forcohen masat në porte

Pas konfirmimit të dy rasteve të para të prekur nga koronavirusi, qeveria ka vendosur pezullimin e lundrimit e transportit detar për pasagjerët drejt veriut të Italisë. Prej së hënës, u ndalua lëvizja e trageteve dhe mjeteve të tjera për pasagjerë në Linjën Durrës-Ankona- Durrës dhe Durrës-Trieste-Durrës.

“Bllokimi i linjave të veriut, Durrës-Ankona-Durrës, dheDurrës-Truiste-Durrës. Këto zona janë futur në karantinë, janë zona të kuqe dhe nuk lejohet hyrja dhe dalja e asnjë njeriu dhe mjeti, vetëm për raste të jashtëzakonshme”. Drejtori i kapitenerisë së përgjithshme, Paulin Ndreu, thotë se në linjat e tjera do të lejohen të lundrojnë deri në një vendim të tyre.

“Linja Durrës-Bari, linja e Brindizit dhe Vlorës si dhe linjat e Korfuzit me Sarandën do të funksionojnë”. Forcimi i masave parandaluese kundër përhapjes së koronavirusit do të prekë edhe anijet e transportit të mallrave. Edhe pse nuk ishte mes linjave të ndaluara, pasagjerët nga Vlora drejt Brindizit nuk udhëtuan të hënën. Agjensitë e udhëtimit njoftuan pasagjerët se trageti nuk do të niset dhe ata do të kompensohen.