Ministri i ri i Mbrojtjes, Pirro Vëngu, i cili mbante më parë detyrën e drejtorit të Autoritet Portual Durrës, thekson se rezultatet e arritura në angazhimin e tij të mëparshëm, ku u shpreh kernar që ishte pjesë e asaj skuadre. ”Shumë aktivitete, punë, sensibilizim social, dedikim, durim dhe profesionalizëm, janë vetëm pak nga shumë virtytet që njerëzit e punës në Autoritetin Portual e gëzojnë dhe për të cilën jam krenar që isha pjesë e kësaj skuadre! Plot mirënjohje për Belinda Balluku për mundësinë që më dha ta përjetoja këtë rrugëtim dhe për lidershipin e saj pa kompromise! Me falenderime të posaçme për anetarët e Këshillit Drejtues të APD për këshillat dhe mbështetjen dashamirëse”,-shkruan Vëngu.
Postimi i plotë
Tetor 2019- Korrik 2024. Kur mora drejtimin e Autoriteti Portual Durrës nuk mund të përfytyroja sfidat natyrore e njerëzore që do përjetonim, duke na devijuar nga objektivat zhvillimore të Qeverisë për infrastrukturën portuale. Nga tërmeti shkatërrues i 2019, ku prioritet ishin qytetarët, dhe Porti i Durrësit shërbeu si qendër logjistike për të gjithë mbështetjen ndërkombëtare në ato momente të vështira, duke vijuar me pandeminë botërore, ku na u imponuan sjellje të reja njerëzore, Porti vazhdoi pa ndalur furnizimin e tregut të brendshëm dhe atij rajonal.
Rikuperimi nisi me vizionin e ri për administrimin portual, në rrugëtimin pa kthim drejt transformimit rrënjësor në Autoritetin me Dy Porte, Marina Turistike e Durrësit nga njëra anë dhe Porti Tregtar i Porto Romanos nga ana tjetër, projekte që tashmë po jetësohen! Falë këmbënguljes dhe dedikimit të një skuadre të madhe ekspertësh të institucioneve tona, nga Ministria e Infrastrukturës, Autoriteti Portual, Forca Detare dhe deri tek Universiteti Politenik i Tiranës, të gjithë të vetëdijshëm se një vepër e tillë mund të realizohet vetëm një herë në 100 vjet!
Durrësi dhe Porto Romano janë dy anë të së njëjtës medalje, të pandara, të pandashme dhe që kompletojnë njëra-tjetrën; dhe kur themi që Durrësi do të ketë dy porte, sot kjo ambicje bëhet një realitet i prekshëm. Në ndërkohë volumet tregtare kanë njohur rritje vit pas viti, e sot me krenari mund ta them që e gjithë kjo është meritë e njerëzve që punojnë në sektorin detar-portual.
Pikërisht kontributit e sakrificës së tyre të pamatë u kemi dedikuar “Javën e Detarisë” e Ditën e Detarëve, të kthyera tashmë në traditë. Për kualifikimin, rritjen profesionale të burimeve njerëzore dhe afrimin e të rinjve me detarinë, kemi bërë të mundur ngritjen e Qendrës së parë të Ekselencës për Çështjetet Detare(CEMA), që tashmë është funksionale dhe efikase.
Shumë aktivitete, punë, sensibilizim social, dedikim, durim dhe profesionalizëm, janë vetëm pak nga shumë virtytet që njerëzit e punës në Autoritetin Portual e gëzojnë dhe për të cilën jam krenar që isha pjesë e kësaj skuadre! Plot mirënjohje për Belinda Balluku për mundësinë që më dha ta përjetoja këtë rrugëtim dhe për lidershipin e saj pa kompromise! Me falenderime të posaçme për anetarët e Këshillit Drejtues të APD për këshillat dhe mbështetjen dashamirëse.